Эронда қулаб тушган «Украина халқаро авиалиниялари» йўловчи самолёти Собиқ иттифоқ даврида яратилган «Тор» зенит ракетаси билан уриб туширилгани тахмин қилинди. Бу ҳақда Пентагон, АҚШ разведкаси ва Ироқдаги ўз манбаларига таяниб Newsweek журнали хабар берган.
Нашр манбалари форсларнинг ракетани тасодифан ишга туширганини таъкидламоқда.
CBS News америкалик сиёсатчиларнинг фикрича, Украина самолёти «Эриб» ҳаводан ҳимоя кучлари томонидан уриб туширилган. АҚШ Эрон радарининг ишга тушганини қайд этган, шунингдек, ракеталарнинг фаоллашгани ҳақидаги иккита чақнаш ҳодисасини аниқлаган. Улар тахминига кўра бу «Тор» зенит ракеталарининг ҳавога чиқарилганидан кейин кузатилган инфрақизил нурлар чақнаши.
CNN телеканали, АҚШ ҳукумати Украина самолёти Эроннинг ракета учиришдаги хатоси туфайли қулагани ҳақидаги фаразга қаттиқ ишонаётгани ҳақида хабар берган. Ушбу тахмин Америка разведкаси йиғаётган сунъий йўлдош, радарлар ва электрон маълумотлар умумлаштирилиши натижасида пайдо бўлган. Associated Press нашри ҳам самолётнинг Эрон хатоси оқибатида қулагани ҳақидаги маълумотларни эълон қилган.
Ўз навбатида Эрон фуқаролик авиацияси ташкилоти самолётнинг ракета воситасида уриб туширилганини инкор этмоқда. «Агар ракета ёки ракета снаряди уриб туширганда самолёт эркин қулаган бўларди», — дея CNNга интервью берган ташкилот раҳбари Али Обидзода.IHS Мarkit компанияси ҳам самолётнинг «Тор» зенит ракетасида уриб туширилганини хабар қилган. Компания таҳлилчилари учоқ қулаган жойдаги фотографиялар ва тасвирларни ўрганиб шундай хулосага келган.
Мавзуга доир: Украина самолётининг Теҳрондаги ҳалокати. Эроннинг Ироқдаги АҚШ базаларига зарбаси. Асосий маълумотлар
Украина хавфсизлик кенгаши самолётнинг қулашига зенит ракетасининг урилиши, теракт ёки двигателда техник носозлик оқибатида юз берган портлаш сабаб бўлгани бўйича версияларни ўрганмоқда.
«Украина халқаро авиалиниялари» (МАУ)нинг Boeing 737 самолёти Теҳрондаги Имом Хумайний аэропортидан ҳавога кўтарилганидан кўп ўтмай қулаган. Самолёт бортида 176 киши бўлган: уларнинг 82 нафари эронлик, 63 нафари канадалик ва 11 нафари украиналик. Йўловчи ва экипаж аъзоларидан ҳеч ким омон қолмаган. Иорданиянинг Al-Hadath нашри самолёт тасодифан Эрон ракетаси билан уриб туширилган бўлиши мумкин, деб ёзганди. Эрон ҳукумати эса двигателдаги алангаланиш ҳалокатга сабаб бўлганини маълум қилди. Украинанинг Теҳрондаги элчихонаси теракт ва ракета ҳужуми тахминлари кўриб чиқилмаётганини билдирди. Даҳшатли ҳалокат туфайли Эрон ва Украинада 9 январь мотам куни деб эълон қилинди
Изоҳ (0)