«Кимдир хато қилган бўлиши мумкин». Трамп Эронда қулаб тушган Украина самолёти техник носоз бўлганига ишонмаяпти (видео)

АҚШ президенти Дональд Трамп Эрон ҳудудида ерга қулаган Украинанинг Boeing 737 самолёти техник носозликлар туфайли ҳалокатга учраганига ишонмаяпти. У бу ҳақда Оқ уйда берган баёнотида маълум қилди, деб хабар берган CNN.

«Бунга шубҳам бор. Ушбу мавзуда гапирмоқчи эмасман, чунки мендан бошқа одамларнинг бу борадаги фикри бутунлай бошқача ва гумонлар ҳам турлича. Нариги томонда турганлардан кимдир хатога йўл қўйган бўлиши мумкин… Бизда хато бўлмаган. Самолёт қулашига алоқамиз йўқ», — деган Трамп.

АҚШ президенти самолёт ноқулай шароитларда учгани, техник носоз бўлгани ҳақида гаплар кўплиги, бироқ у бунга умуман ишонмаслигини қайд этган.

Шунингдек, Трамп Украина самолётининг тасодифан ёки атайин уриб туширилгани борасида маълумотга эга эмаслигини қўшимча қилган. Унинг сўзларига кўра ҳалокат сабаблари лайнер қора қутилари топилгач ошкор бўлади.

Trump on plane that crashed in Iran: "I have my suspicions ... it was flying in a pretty rough neighborhood. Some people say it was mechanical. I don't even think that's a question, personally." pic.twitter.com/2TNJosBPRi

— Aaron Rupar (@atrupar) January 9, 2020

«Жуда аянчли ва мудҳиш воқеа содир бўлган», — дея Оқ уйдаги баёнотига якун ясаган Трамп.

«Украина халқаро авиалиниялари» (МАУ)нинг Boeing 737 самолёти Теҳрондаги Имом Хумайний аэропортидан ҳавога кўтарилганидан кўп ўтмай қулаган. Самолёт бортида 176 киши бўлган: уларнинг 82 нафари эронлик, 63 нафари канадалик ва 11 нафари украиналик. Йўловчи ва экипаж аъзоларидан ҳеч ким омон қолмаган. Иорданиянинг Al-Hadath нашри самолёт тасодифан Эрон ракетаси билан уриб туширилган бўлиши мумкин, деб ёзганди. Эрон ҳукумати эса двигателдаги алангаланиш ҳалокатга сабаб бўлганини маълум қилди. Украинанинг Теҳрондаги элчихонаси теракт ва ракета ҳужуми тахминлари кўриб чиқилмаётганини билдирди. Даҳшатли ҳалокат туфайли Эрон ва Украинада 9 январь мотам куни деб эълон қилинди. Америка ОАВ, жумладан CNN манбалари самолётнинг қулашига Эроннинг ракета учиришдаги хатоси ҳам сабаб бўлиши мумкинлиги ҳақида хабар тарқатган.