Вазирлар Маҳкамасининг «2019—2021 йилларда Тошкент вилоятида туризм соҳасини жадал ривожлантириш тўғрисида»ги қарори қабул қилинди, деб хабар беради Туризмни ривожлантириш давлат қўмитаси.
Ҳужжатга кўра, Тошкент вилоятидаги ҳар бир туман ўзига хос бўлган туристик маҳсулотларни ишлаб чиқиб, туризмнинг алоҳида йўналишларини ривожлантириб боради:
- вилоятнинг Бўстонлиқ, Оҳангарон, Паркент, Бўка, Чиноз, Зангиота туманлари ва Ангрен шаҳрида зарур инфратузилмани шакллантириш орқали улар ўртасида ўзаро боғлиқликни таъминлаш асосида туристларнинг узлуксиз саёҳатлари учун қулай шарт-шароитлар яратиш мақсадида ушбу ҳудудларни «Олтин ҳалқа» туризм концепцияси асосида ривожлантириш;
- Паркент туманининг «Кумушкон» маҳалла фуқаролар йиғини ҳудудида зарур инфратузилмани барпо этиш, оилавий меҳмон уйлари фаолиятини ва қўшимча туризм хизматларини йўлга қўйиш ҳамда маҳаллий аҳолини туризм соҳасидаги тадбиркорликка кенг жалб этиш мақсадида «Кумушкон туризм қишлоғи»ни ташкил этиш тўғрисидаги таклифлари маъқулланди.
- «Зангиота—Чиноз—Бўка—Оҳангарон—Ангрен—Паркент—Бўстонлиқ» йўналишида туризм маршрутлари ва йўл кўрсаткич хариталарини ишлаб чиқиш;
- ҳудудлардаги туристик объектларни хатловдан ўтказиш, объектларнинг барча маълумотларини ўз ичига олган паспортларини тайёрлаш, ҳар бир туризм объектида хизмат кўрсатиш сифатини яхшилаш бўйича йўл хариталарини ишлаб чиқиш;
- туризм маршрутларидаги мавжуд йўлбўйи инфратузилмаларини хатловдан ўтказиш, уларда хизмат кўрсатиш сифатини яхшилаш чораларини кўриш, янги ташкил этиш зарур бўлган йўлбўйи инфратузилмаларини жойлаштириш манзилларини белгилаш ва намунавий лойиҳаларини тайёрлаш;
- туризм маршрутларида янги туризм объектларини ташкил этиш юзасидан жаҳон тажрибасини ўрганиш, янги туризм объектларини барпо этиш манзилларини аниқлаш, намунавий лойиҳаларини ишлаб чиқиш ва амалга ошириш;
- туризм маршрутларида алоҳида «Олтин ҳалқа» йўналишли таксилар, замонавий енгил автомашиналар, микроавтобуслар ва автобуслар қатновини ташкил қилиш;
- концепция доирасида ҳудудларнинг йўл инфратузилмасини яхшилаш чораларини кўриш;
- ҳудудларда туристлар учун миллий урф-одатларни намойиш этувчи маданий-кўнгилочар тадбирлар дастурини ишлаб чиқиш ва доимий равишда ташкил этиш;
- ҳар бир ҳудуднинг миллий чойхоналарини ташкил этиш;
- ҳунармандчиликни ривожлантириш, туристлар учун эсдалик совғалари тайёрлашни йўлга қўйиш, ҳунармандларнинг уй-музейларини ташкил этиш;
- оилавий меҳмон уйларини ташкил қилиш бўйича тушунтириш ишлари олиб бориш ва аҳолини тадбиркорликка жалб қилиш;
- «Олтин ҳалқа» туризм концепцияси доирасида Тошкент вилоятининг туризм салоҳиятини тарғиб қилиш бўйича видеороликлар, қўлланмалар, йўл кўрсаткичлар, реклама-тарғибот материаллари тайёрлаш ва тарқатиш;
- туризм объектларида хизмат кўрсатиш сифатини яхшилаш бўйича соҳада фаолият юритаётган хўжалик юритувчи субъектлар ходимлари учун махсус ўқув курсларини ташкил қилиш.
Изоҳ (0)