Ўзбекистон Солиқ кодексининг янгиланган таҳририда Google учун солиқ солиниши белгилаб қўйилди, деб хабар беради Spot.
Унда айтилишича, электрон шаклда товарлар ва хизматларни кўрсатадиган, хизмат кўрсатиш жойи Ўзбекистон бўлган хорижлик юридик шахслар жисмоний шахсларга кўрсатилаётган бундай хизматлар бўйича солиқ тўловчилар сифатида тан олинади.
14 турдаги хизматлар электрон хизматлар рўйхатидан ўрин олган. Улар орасида қидирув тизимларидан фойдаланиш, потенциал харидорлари топиш ва уларга буюртмачи томонидан хизмат кўрсатиш, интернетда реклама хизматини кўрсатиш ва бошқа хизмат турлари бор.
Таъкидланишича, мазкур янгилик Google, «Яндекс», турли агрегат ва бошқа сайтларга тааллуқли ҳисобланади.
Улар оборотга қўшилган қиймат солиғини (ҚҚС) тўлашлари керак. Солиқ солинадиган база ушбу хизматларнинг реал нархлари асосида ҳисобланган солиқ суммасини инобатга олган ҳолда кўрсатилган хизматларнинг қийматига қараб белгиланади.
Шунингдек, компаниялар ёки воситачилар хизмат кўрсатиш бошланганидан 30 кун ичида солиқ идораларига бориб рўйхатдан ўтиши керак.
«Google учун солиқ» бошқа давлатларда ҳам бор, масалан, 2017 йилдан бери Россияда. Чет элда рўйхатдан ўтган IT-компаниялар электрон хизмат кўрсатиш орқали олган даромадининг 18 фоизи миқдорида ҚҚС тўлашга мажбур. 2018 йилда «Google учун солиқ» россияликларга 12 миллиард рубл (180 миллион доллар) олиб келган.
2019 йилнинг декабрь ойида Давлат солиқ қўмитаси раҳбари Беҳзод Мусаев қўмита ҳар бир солиқ тўловчи компаниялари билан Ўзбекистонда доимий фаолият кўрсатадиган муассасалар яратиш учун босқичма-босқич иш олиб боришини маълум қилганди.
Аввалроқ Солиқ қўмитасининг вакиллари реклама ортидан пул топаётган барча солиқ тўлаши лозимлигини таъкидлагандилар. Улар орасидан Telegram-каналлар, Instagram ва Facebook’даги блогерлар ўрин олган.
Изоҳ (0)