Ижтимоий тармоқларда Тошкент вилояти Янгийўл туманида Matiz автомашинасининг йўл четида ёнаётгани акс этган видеолавҳа тарқалди. Ҳодисани тасвирга олаётган шахснинг изоҳ беришича, Matiz эгаси ўз машинасини ЙПХ ходимларига жаҳл қилиб ёқиб юборган.
ЎзАнинг хабар беришича, ҳолат Тошкент вилояти ИИББ томонидан ўрганилиб, воқеа тафсилотлари маълум қилинган.
Қайд этилишича, воқеа 1 январь куни содир бўлган. Янгийўл шаҳар ИИБ ЙҲХБ ходимлари Matiz’нинг шаҳар деҳқон бозори олдида «тўхташ тақиқланади» 3,27 йўл белгиси таъсири остида тўхтаб турганлигини аниқлаб, ҳайдовчидан тегишли ҳужжатларни сўраган.
Ҳайдовчи ЙПХ инспекторлари билан қўпол муомалада бўлиб, ҳужжатлари йўқлигини айтган. Ходимлар унга нисбатан қонунда белгиланган тартибда маъмурий баённома расмийлаштириш кераклигини билдирган. Шундан сўнг ҳайдовчи ўзини ғайритабиий тутиб, жаҳл қилиб, автомобилнинг олд капотини очиб, ўт қўйиб юборган ва воқеа жойидан қочиб кетган.
Ёнғин зудлик билан Янгийўл шаҳар Ёнғин хавфсизлик хизмати томонидан бартараф этилиб, гувоҳлардан олинган баённомаларда ҳақиқатан ҳам ҳайдовчи ўз автомобилини ўзи ёқиб юборганлиги маълум қилинган.
Аниқланган маълумотларга кўра, ҳайдовчи мазкур ҳолатда оила аъзолари билан ўзаро жанжал сабабли асабий ҳолатда бўлган.
Ҳозирда ФВВ ЁХБ томонидан қўшимча суруштирув ҳаракатлари олиб борилмоқда.
Изоҳ (0)