Ички ишлар вазирлиги ЙҲХББ ахборот хизмати мобил камералардан фойдаланиш тартиби бўйича айрим саволларга жавоб берди.
Унга кўра, 2020 йилнинг 1 январь кунидан Ички ишлар вазирлиги Давлат йўл ҳаракати хавфсизлиги хизматининг барча ЙПХ ходимлари хизматни мобил камерадан фойдаланган ҳолда ўташни бошлади.
«Шу муносабат билан, ЙПХ ходими Сизни тўхтатиб мулоқотга киришганда, мазкур мулоқот мобил камерага ёзиб олинишини, келгусида ноқонуний хатти-ҳаракатлар содир этсангиз, айбингизни исботлаш учун видеоёзувдан фойдаланилиши мумкинлигини эслатиб ўтамиз.
Ходимлар томонидан фойдаланилаётган мобил камералар, ходимнинг йўл ҳаракати иштирокчилари билан ўзаро мулоқотини тасвирга олиб, ушбу мулоқотнинг самимий, хушмуомалалик асосида бўлишига ҳамда зиддиятли ва нохуш вазиятларни, шунингдек, коррупция ҳолатларини олдини олишга хизмат қилади.
Айрим ҳолларда эса ходимнинг хатти-ҳаракатлари устидан ариза ва шикоятлар билдирилганида, ушбу видеоёзувлар ҳолатга ойдинлик киритишга ёрдам беради.
Шу ўринда фуқаролардан келаётган айрим саволларга тўхталадиган бўлсак:
Мобил камерадан ЙПХ ходимининг йўл ҳаракати қатнашчиси билан мулоқотини тасвирга олиш учун фойдаланилади;
ЙПХ ходими ҳайдовчига унинг содир этган қоидабузарлигининг видеотасвирини кўрсатиб беришга мажбур эмас;
барча хизматга жалб этилаётган ходимлар мобил камерадан фойдаланган ҳолда хизмат ўтайди. ЙПХ ходимининг мобил камерасиз хизмат ўташига йўл қўйилмайди;
Вазирлар Маҳкамасининг 2018 йил 1 декабрдаги 975-сонли сонли қарори билан тасдиқланган низомнинг 18-бандига асосан йўл ҳаракати қатнашчилари хизматни мобил видеокамерасиз олиб бораётган ЙПХ ходимига ҳужжатларни тақдим этмаслик ҳуқуқига эга.
Кўриниб турибдики, амалга оширилаётган бу саъй-ҳаракатларнинг барчаси биринчи навбатда Сиз учун, Сизнинг хавфсизлигингиз ва қонуний манфаатларингизнинг ҳимояси учун амалга оширилмоқда. Шундай экан, яратилаётган шароитлардан тўғри ва оқилона фойдаланишларингизни, ҳаракатланиш хавфсизлигини таъминлаш ишларига муносиб ҳисса қўшишингизни сўраймиз», — дейилади хабарда.
Хушнуд Худойбердиевнинг аниқлик киритишича, ЙПҲ инспекторининг мобил телефони боди-камера вазифасини ўтамайди ҳамда инспекторлар мобил телефондаги видеога ёзиб олаётганини рўкач қилиб, ҳайдовчилар билан мулоқотга киришиши мумкин эмас. Боди-камералар керагича харид қилинган ва барча инспекторлар таъминланган.
Изоҳ (0)