Ijtimoiy tarmoqlarda Toshkent viloyati Yangiyo‘l tumanida Matiz avtomashinasining yo‘l chetida yonayotgani aks etgan videolavha tarqaldi. Hodisani tasvirga olayotgan shaxsning izoh berishicha, Matiz egasi o‘z mashinasini YPX xodimlariga jahl qilib yoqib yuborgan.
O‘zAning xabar berishicha, holat Toshkent viloyati IIBB tomonidan o‘rganilib, voqea tafsilotlari ma’lum qilingan.
Qayd etilishicha, voqea 1-yanvar kuni sodir bo‘lgan. Yangiyo‘l shahar IIB YHXB xodimlari Matiz’ning shahar dehqon bozori oldida “to‘xtash taqiqlanadi” 3,27 yo‘l belgisi ta’siri ostida to‘xtab turganligini aniqlab, haydovchidan tegishli hujjatlarni so‘ragan.
Haydovchi YPX inspektorlari bilan qo‘pol muomalada bo‘lib, hujjatlari yo‘qligini aytgan. Xodimlar unga nisbatan qonunda belgilangan tartibda ma’muriy bayonnoma rasmiylashtirish kerakligini bildirgan. Shundan so‘ng haydovchi o‘zini g‘ayritabiiy tutib, jahl qilib, avtomobilning old kapotini ochib, o‘t qo‘yib yuborgan va voqea joyidan qochib ketgan.
Yong‘in zudlik bilan Yangiyo‘l shahar Yong‘in xavfsizlik xizmati tomonidan bartaraf etilib, guvohlardan olingan bayonnomalarda haqiqatan ham haydovchi o‘z avtomobilini o‘zi yoqib yuborganligi ma’lum qilingan.
Aniqlangan ma’lumotlarga ko‘ra, haydovchi mazkur holatda oila a’zolari bilan o‘zaro janjal sababli asabiy holatda bo‘lgan.
Hozirda FVV YoXB tomonidan qo‘shimcha surushtiruv harakatlari olib borilmoqda.
Izoh (0)