Мингбулоқ ҳокими қўл остидаги ходимларни аёвсиз ҳақоратлагани хабар қилинди (аудио)

Ижтимоий тармоқларда 2 январь куни Наманган вилояти Мингбулоқ тумани ҳокими Нуршод Худойбердиевга мансублиги таъкидланиб тарқатилган аудиоёзув тарқалди.

Аудиоёзув турли ҳақоратларга тўла; унинг қачон, қаерда ёзиб олингани, ҳоким деб тахмин қилинаётган овоз эгаси нима сабабдан қўл остидаги ходимларни ҳақорат қилаётгани номаълум.

Ушбу ҳолат юзасидан 2 январь куни Наманган вилояти ҳокимлигининг Telegram’даги каналида қуйидагича баёнот пайдо бўлди:

Мингбулоқ тумани ҳокимига мансублиги таъкидланиб тарқатилган аудиоёзув бўйича Наманган вилояти ҳокимлиги баёноти

Ижтимоий тармоқларда Мингбулоқ тумани ҳокими Нуршод Худойбердиевга мансублиги таъкидланиб тарқатилган, ҳақоратли сўзлар ишлатилган ҳолда олиб борилган мулоқотнинг аудиоёзуви қачон, қаерда ва қандай ҳолатларда юз берганлиги ҳамда бошқа ҳолатлар юзасидан Наманган вилояти ҳокимлиги томонидан ўрганиш бошланди.

Ўрганиш натижалари ҳар томонлама қонун доирасида кўриб чиқилиб, улар юзасидан қўшимча баёнот берилади.

Сабаби қандай бўлишидан қатъий назар, туман ҳокимининг ўз лексикасида ахлоққа мос келмайдиган сўзларни ишлатиши, шахснинг шаъни ва қадр-қимматини қасддан камситувчи иборалардан фойдаланиши вилоят ҳокимлиги томонидан кескин қораланади ҳамда аудиоёзув Мингбулоқ тумани ҳокимига тегишлилиги исботланса, тегишли қонуний жазо чораси кўрилади.

Наманган вилояти ҳокимлиги

Маълумот учун, 1983 йилда Янгиқўрғон туманида туғилган Нуршод Худойбердиев 2019 йил мартида Мингбулоқ тумани ҳокими вазифасини бажарувчи этиб тайинланган эди. 2004 йилда Наманган муҳандислик-педагогика институтини тамомлаган. Маълумоти бўйича мутахассислиги агромуҳандис. У мазкур тайинловга қадар Норин-Сирдарё ирригация тизимлари ҳавза бошқармаси бошлиғи вазифасида ишлаган.