Қашқадарёнинг Ғузор туманида яшовчи, Қарши муҳандислик иқтисодиёт институти 4-курс талабаси бўлган Д.М. исмли 22 ёшли қиз 7 декабрь куни ўзи яшайдиган уйдан осилган ҳолда топилгани ҳақида хабар берилган эди. «Дарё»нинг ИИВнинг манбалари ушбу ҳолат юзасидан қўшимча маълумот берди.
Маълум қилишларича, қизнинг отаси мактабда ўқитувчи бўлиб ишлайди, онаси эса уй бекаси. Оиладаги олти фарзанднинг уч нафари контракт асосида олийгоҳда ўқийди. «Оиланинг яшаш шароити оғир. Оиладаги етишмовчиликлар эса келишмовчиликлар келтириб чиқарган бўлиши мумкин, деган тахмин бор», — дейди манба.
Д.М. ўқишда жуда босиқ, вазмин бўлган, фанлардан ўрта баҳоларда ўқиган, сабабсиз дарс қолдирмаган, курсдошлари билан муносабати яхши бўлган. Сентябрда институт психологи томонидан ижтимоий-психологик ҳолати таҳлил қилинганида, ҳеч қандай салбий ҳолатлар қайд этилмаган.
Воқеадан сўнг Д.М.нинг отаси билан гаплашган манбанинг сўзларига кўра, воқеа юз берган куни қиз соат тахминан 10:00 да нон ёпган, орадан ярим соат ўтар-ўтмас осилган ҳолда топилган. Қўшимча қилишларича, 5 январга Д.М.нинг фотиҳа тўйи белгиланган эди.
Изоҳ (0)