Шу йилнинг 25 декабрь куни Тошкент шаҳар Бектемир туман 105-сайлов участка сайлов комиссия аъзолари томонидан бир қанча сайлов бюлетенларини сайлов қутисига ўзлари ташлаб, сайлов натижаларини сохталаштиришга уринаётгани акс этган видео пайдо бўлган эди.
«Sof.uz»нинг ёзишича, ҳолат юзасидан Марказий сайлов комиссияси томонидан Тошкент шаҳар сайлов комиссияси, Бектемир туман сайлов комиссияси ва прокуратура органлари билан биргаликда ўрганиш ишлари амалга оширилди.
Ўрганиш натижасига кўра, 105-участка сайлов комиссиясининг 22 декабрдаги сайлов натижалари бўйича қабул қилган қарорлари бекор қилинди ва ҳақиқий эмас деб топилди.
Қайд этилишича, мазкур сайлов участкаси бўйича сайлов натижалари Олий Мажлис Қонунчилик палатасига сайлов ўтказувчи 141-Темирйўлчилар ва Халқ депутатлари Тошкент шаҳар Кенгашига сайлов ўтказувчи 8-Сувчи шаҳар округ сайлов комиссияларининг тегишли округлар бўйича сайлов натижаларига таъсир қилмаслиги инобатга олинди.
Бектемир тумани сайлов комиссияси томонидан 18-Висол сайлов округида 2020 йил 19 январь куни такрорий сайлов ўтказиш тўғрисида қарор қабул қилинди. Шунингдек, туман сайлов комиссияси томонидан 105-участка сайлов комиссиясининг таркибини алмаштириш ишлари ҳам амалга оширилади.
Прокуратура органлари томонидан ушбу ҳолатга ҳуқуқий баҳо бериш учун суриштирув ишлари давом эттирилмоқда.
Аввалроқ, Тошкент шаҳар ҳокимлиги Яшнобод туманидаги сайлов участкаларида «черновик» протоколлардан фойдаланиши ҳолатлари содир бўлгани ҳақида хабар берилганди. Кейинроқ журналистлар ва блогерлар ярим тун бўлишига қарамасдан Яшнобод туманига йўл олиб, мазкур вазиятни ўрганган эди.
Изоҳ (0)