Андижон тумани ҳудудида жойлашган «Юлдуз» подстанциясида 125 000 кВА қувватли 2-куч трансфоматори 200 000 кВА қувватли куч трансформаторига алмаштирилиши муносабати билан Андижон вилоятининг айрим ҳудудларида 24—29 декабрь кунлари электр таъминотида узилишлар бўлиши ҳақида хабар берилган эди.
«Ўзбекистон миллий электр тармоқлари» компаниясидан маълум қилишларича, «Юлдуз» подстанциясида мавжуд иккита 125 000 кВА қувватли автотрансформаторларнинг бири 20—26 ноябрь кунлари алмаштирилган, иккинчисини алмаштириш ишлари эса 24—29 декабрь кунлари эмас, балки 2020 йилнинг январь ойида амалга оширилиши режалаштирилган.
«Бунинг учун зарур барча жиҳоз ва ускуналар шай ҳолатга келтирилган», — дейилади компания ахборотида. Қайд этишларича, «Юлдуз» подстанциясида олиб борилаётган модернизация дастурига оид амалиётлар Фарғона водийси аҳолисини сифатли электр энергияси билан узлуксиз таъминлашга хизмат қилиши назарда тутилган.
Ижтимоий тармоқлардаги Андижон вилояти янгиликларини ёритиб борувчи оммабоп каналларда: «Парламент сайловлари якунлангач, Андижонда электр энергиясида узилишлар бўлиши хабар қилинмоқда» қабилидаги хабарлар тарқалган, бунга «Юлдуз» подстанциясида амалга оширилиши кўзда тутилган ишлар асос қилиб кўрсатилган эди.
Кейинроқ ўша манбаларда: «Электр энергияси истеъмолчиларининг хоҳиш ва истакларини инобатга олган ҳолда мазкур куч трансформаторини ўрнатиш ва таъмирлаш ишлари Янги йил байрами муносабати билан 2020 йил январь ойида бажарилишини маълум қиламиз», деган мазмунда раддия берилди.
Ўз навбатда, «Ўзбекистон миллий электр тармоқлари корхонаси» тарқатилган ушбу хабарларга шундай муносабат билдирган:
«Турли носозликлар туфайли электр таъминотида узилишлар бўлиб туриши табиий ҳол, бу ҳақда «Ҳудудий электр тармоқлари» компанияси матбуот хизмати томонидан ҳар куни расмий баёнотлар бериб борилмоқда ва бу каби техник масалаларни мамлакатдаги сиёсий тадбирлар билан боғлаш мутлақо нотўғри».
Изоҳ (0)