Навоий вилоятида октябрь ойи бошларида номаълум шахс 21 ёшли У.Ҳ.нинг номига расмийлаштирилган пластик карточкаси ҳисобидан яширин равишда пул ўтказиш йўли билан жами 4 523 000 сўм пулини ўғирлаган. ИИВ ҳузуридаги Тергов депаратменти ахборотига кўра, У.Ҳ. мазкур ҳолат юзасидан ИИБга мурожаат қилган.
Ҳолат юзасидан Зарафшон шаҳар ИИБ ҳузуридаги Тергов бўлими томонидан Жиноят кодексининг 169-моддаси (ўғирлик) 3-қисми «б» банди билан жиноят иши қўзғатилган. «Дастлабки тергов жараёнида мазкур жиноятни ‘Асака банк’ Зарафшон шаҳар филиали иш ўрганувчиси 33 ёшли Р.М. содир этилганлиги аниқланиб, ушланган», — дейилади Тергов департаменти ахборотида.
Р.М. банк филиалига мурожаат қилган У.Ҳ.дан унинг номига расмийлаштирилган, ҳисобида 6 000 000 сўм пул бўлган пластик карточкасини нақд пул қилиб бериш учун олиб, ушбу пластик карточкага усталик билан ўзининг телефон рақамини «Осон» дастури орқали улашга эришган. У 2019 йил 9—10 октябрь кунлари яширин равишда ушбу карта ҳисобидан бўлиб-бўлиб жами 4 523 000 сўм миқдоридаги пулларни ўтказиб олиб, кейинчалик уларни ўзлаштирган.
«Р.М.га нисбатан шу модда билан айблов эълон қилиниб, гаров эҳтиёт чораси қўлланилган. Ҳозирда ушбу жиноят иши бўйича дастлабки тергов ҳаракатлари олиб борилмоқда», — дея қўшимча қилинган Тергов департаменти ахборотида.
Мавзуга доир:
«Асака банк» гумон қилинувчи Р.М.нинг ушбу банк тизимида ишлашини рад этди
«Асака банк» матбуот хизматининг хабар беришича, 1986 йилда Бухоро вилояти Ғиждувон туманида туғилган Р.М. банкнинг Зарафшон филиалига ишга кириш мақсадида 2019 йилнинг октябрь ойида бир неча маротаба келиб-кетиб юриб, оғзаки равишда мурожаат қилган.«Фуқаро Р.М. ҳеч қачон ‘Асака банк’ тизимида ишламаган ва ҳатто иш ўрганувчи сифатида расмийлаштирилмаган. Унинг амалга оширган фирибарлигига ‘Асака’ банки ва ходимларининг ҳеч қандай алоқаси йўқ», — дейилади банк раддияси.
Маълумот учун: Ўзбекистон Республикасининг «Оммавий ахборот воситалари тўғрисида»ги қонуни 40-моддасига мувофиқ, «бош муҳаррир, шунингдек журналист оммавий ахборот воситаларида ҳақиқатга мос келмайдиган материалларни тарқатганлик учун қуйидаги ҳолларда жавобгар бўлмайди: агар бу маълумотлар расмий хабарлардан,.. давлат ҳокимияти ва бошқаруви органларининг матбуот хизматлари, шунингдек уларнинг расмий веб-сайтлари орқали олинган бўлса».
Изоҳ (0)