Давлат божхона қўмитасининг Контрабанда ва божхона қонунчилиги бузилишига қарши курашиш бошқармаси, «Тошкент-аэро» ихтисослаштирилган божхона комплекси, Сурхондарё вилояти божхона бошқармаси ходимлари томонидан йирик миқдордаги гиёҳвандлик воситаларининг контрабандаси фош этилди. Бу ҳақда Божхона қўмитаси ахборот хизмати хабар берди.
«Тошкент» халқаро аэропортида хорижий давлатга парвози олдидан 4 нафар чет эл фуқаролари — М.Т., С.М., Я.А. ва Н.Н. божхона назоратидан ўтиши чоғида уларнинг хатти-ҳаракатлари ва безовталаниши божхона ходимлари эътиборини тортди. Аввалига уларнинг қўл юклари ва эгнидаги кийимлари кўздан кечирилди. Бир қарашда ҳаммаси жойидадек туюлди.
Шундан сўнг йўловчилар аэропортдаги божхона постига ўрнатилган инсон тана аъзоларини сканерловчи Body scaning қурилмаси орқали кўздан кечирилди. Экрандаги тасвирлар шубҳали тус олди. Қурилма ушбу йўловчиларнинг организмида, аниқроғи, йўғон ичак каналларида ёт жисмлар борлигини кўрсатди.
Мазкур ҳолатга ойдинлик киритиш мақсадида ушбу шахслар белгиланган тартибда пойтахтдаги Шошилинч тиббий ёрдам кўрсатиш Республика илмий марказига олиб келиниб, шифокорлар томонидан холислар иштирокида тиббий кўрикдан ўтказилди.
Кўрик натижасида 4 нафар йўловчининг ички аъзоларига махсус ўрамлар яширилганлиги аниқланди ва чиқариб олинди.
Экспертиза хулосасига кўра, 4 нафар наркокурьерларнинг ички аъзоларида яширилган жами 268 та ўрам ичида умумий вазни 4 килограмм 152,52 граммни ташкил этувчи героин гиёҳвандлик воситаси яширилганлиги аниқланди.
Тезкор тадбир давомида Сурхондарё вилояти божхона бошқармаси «Айритом» чегара божхона постида ҳам яна бир наркокурьер қўлга олинди. М.М.исмли шахснинг ички аъзоларида 67 дона овалсимон шаклдаги ўрамларда 1 килограмм 42 граммдан ортиқ опий гиёҳвандлик воситаси борлиги аниқланди.
Шунингдек, божхоначилар «Тошкент» халқаро аэропорти орқали хорижга йўл олган С.М.нинг режасини ҳам фош этди. Гап шундаки, ушбу шахс ўз ички аъзоларига 35 дона овалсимон шаклдаги ўрамларда 544,75 граммдан ортиқ героин гиёҳвандлик воситасини яширган экан. Шундан сўнг унга мазкур гиёҳвандлик воситаларини етказиб берган жиноий шериги, хорижий давлат фуқароси Қ.Р.ҳам ушланди.
Божхона ходимлари томонидан ўтказилган тезкор тадбирлар натижасида умумий оғирлиги 5 килограмм 739 граммдан ортиқни ташкил этувчи героин ҳамда опий гиёҳвандлик воситаларини ичига ютган ҳолда олиб ўтмоқчи бўлган жами 7 нафар наркокурьер ҳамда мазкур жиноятларнинг асосий ташкилотчилари бўлган 3 нафар хорижий давлат фуқароси қўлга олинди.
Ҳозирда мазкур аниқланган барча ҳолатлар юзасидан божхона органлари томонидан Жиноят кодексининг тегишли моддалари билан жиноят ишлар қўзғатилиб, тергов органига юборилди.
Изоҳ (0)