Бош прокуратура блогер томонидан эълон қилинган Сергели тумани сайлов участкасидаги ҳолатни текширишни бошлади

Бош прокуратура томонидан «Сафари» Telegram канали орқали эълон қилинган Сергели тумани сайлов участкасидаги ҳолат бўйича текширувни бошлади.

Тошкент шаҳар, Сергели туманидаги 426-сайлов участкасида сайлов бюллетенлари қалбакилаштирилган. Бу ҳақда блогер Нозим Сафаров ўзининг Telegram каналида маълум қилди.

Сергели туманидаги тўртинчи ҳолат. Эндиги навбат 17-округга. Сайлов бюллетенлари қалбакилаштирилиши ҳолати аниқланди. Белгиланган бюллетенлар олдиндан тайёрланиб қўйилган.

Сергели тумани кенгаши учун сайловлар бекор қилиниши лозим. Майли ман номзодимни қўймайман. Лекин ҳақиқат қарор топиши керак. Битта туманда 4 та катта ҳолат бу жуда кўп. Рўйхатдан ўтмаган қурувчилар, тишлайдиган ўқитувчилар ҳамда қалбаки сайлов варақалари. Ҳаммасида ўқитувчилар. Уларни айнан ким маъмурий ричаглар орқали ҳаракатлантираётгани аниқ.

Сергели туман ҳокимига яна мурожаат: Шунча хорижий кузатувчилар бизни кузатаётганида нима деб ўйлайсиз, мамлакат имиджини ошириш йўлида қанчалик ҳисса қўшяпсиз?

Нозим Сафаров, блогер

Аввалроқ Нозим Сафаров ўқитувчилардан бири қўлини тишла олгани ҳақида ёзган эди.

«Ўқитувчилардан кўнглим қолди. Ҳаммасидан эмас. Депутатликка номзодимни аслида ютишга умид қилмасдан қўйгандим. Мен ўйинлар бўлишини билгандим. Лекин бунчалик эмас. Шарафсизлар ўқитувчиларни тотал эксплуатация қилиб, хоҳлаган ишларини қилишди. Ҳатто шунчаликки ўқитувчилардан бири қўлимни тишлаб олди», — дейди блогер.

Прокуратура юқоридаги ҳолат бўйича текшириш натижаларини маълум қилишини билдирди.