Скриншотларда Қудрат Ҳусанов номидан қолдирилган ёзувларни кўриш мумкин, унда Ҳусанов овоз бериш жараёни якунига етиши билан сайлов участкаларидаги протоколларнинг «черновик» вариантларини зудлик билан олиб келиш ҳақида топшириқ берган. «Черновикдан копия ҳам берилмасинми?», деган саволга, у: «Йўқ, опа, умуман», деб жавоб берган. Ёзишмаларда: «Ҳеч ким протоколни расмга олдирмасин», деган ёзув ҳам бор.
Хушнудбек Худойбердиевнинг аниқлик киритишича, ёзишмадаги гап-сўзлар туман кенгаши депутатлиги учун сайловларга тааллуқли.
Тошкент шаҳар ҳокимлиги ахборотида тасдиқланишича, ёзишма ҳақиқатан ҳам Яшнобод туман сайлов комиссиясининг сайлов округлари масъуллари учун очилган хос Telegram-гуруҳда олиб борилган.
Шаҳар ҳокимлиги ва ҳуқуқ-тартибот органлари олиб борган ўрганиш натижаларига кўра, бу ёзувлар ҳақиқатан ҳам Яшнобод тумани кадрлар бўлими раҳбари Қудрат Ҳусановга тегишли экани аниқланган.
«У ҳақиқатан ҳам сайлов округлари масъулларини «черновик» протоколлари билан айтилган манзилга етиб келишларини талаб қилган», — дейилади ҳокимлик ахборотида.
Айни пайтда «черновик»лардаги маълумотлар ҳеч қандай ўзгаришсиз, назорат остида оригинал протоклларга кўчирилмоқда.
Қудрат Ҳусанов ҳамда бошқа масъулларнинг ҳаракатлари ўрганилмоқда ва сайлов натижаларига аралашиш ҳолати аниқланса, уларга нисбатан тегишли чоралар кўрилади, дейилади ҳокимлик ахборотида.
Марказий сайлов комиссияси (МСК) ҳам ҳодиса ўрганилаётганини маълум қилди. МСК вакиллари, ҳуқуқ-тартибот органлари ходимлари, «Дарё», «Gazeta.uz», «Kun.uz» ва бошқа нашрлар журналистлари, блогерлар ва Хушнуд Худойбердиевнинг ўзи Яшнобод туманига йўл олган.
МСКдан маълум қилишларича, ушбу суриштирув ишларида хорижлик кузатувчилар ҳам ҳеч бир монеликсиз иштирок этишлари мумкин.
Изоҳ (0)