19 декабрь куни кечқурун Москва шаҳридаги Лубянская майдонида жойлашган ФХХ биносига ҳужум юз берди.
Дастлаб бинога ҳужум қилганлар сони уч киши эканлиги айтилди, кейинроқ бир киши ҳужум қилгани маълум қилинди.
Ҳужум чоғида юз берган отишма оқибатида ФХХ ходимларидан бири ҳалок болди, яна беш киши яраланди. Улардан икки нафарининг жароҳати оғир эканлиги айтилмоқда. Жабрланувчилардан бири маҳаллий аҳоли вакили, унинг жароҳати унчалик оғир эмас.
Отишма Россия президенти Владимир Путиннинг анъанавий матбуот анжуманидан сўнг юз берди. Ўша пайтда президент ФХХ кунига бағишланган концерт дастурида, яъни Кремл саройида эди.
Meduza’нинг хабар беришича, ушбу ҳужумни 39 ёшли Евгений Манюров уюштирган. У Россия давлат адлия университетида ўқиган. Мутахассислиги бўйича ҳуқуқшунос бўлган.
У 19 декабрь куни уйдан чиқиб кетаётганида онасига «ўқ отиш бўйича мусобақа»га кетаётганини айтган. Онасининг таъкидлашича, сўнгги пайтларда Евгений телефон орқали тез-тез «қандайдир араблар билан инглизча гаплашиб турган». У БАА элчихонасида қоровул бўлиб ишлаган.
Онасининг сўзларига кўра Евгений болалигида бокс ва қўл жангига қизиққан, ичмаган, чекмаган, инглиз тилини яхши билган.
Евгений ўқ отиш билан профессионал даражада шуғулланган. Тинтув пайтида унинг уйидан турли ўқотар қуроллар топилган. Қуролларнинг ҳужжати ҳам бўлган.
Қайд этилишича, ушбу ҳужумга теракт сифатида баҳо берилмайди. Россия тергов қўмитаси ҳуқуқни муҳофаза қилиш органлари ходимининг ҳаётига тажовуз қилиш моддаси бўйича жиноят иши қўзғатган.
Изоҳ (0)