Халқ депутатлари Тошкент шаҳар кенгаши депутатлиги ЎзЛиДеП томонидан номзоди қўйилган шахс ўз сайловолди ташвиқотига қонунга зид тарзда олиб боргани аниқланди. Бу ҳақда «Дарё»га Бош прокуратура матбуот хизмати маълум қилди.
Қайд этилишича, Сайлов кодексининг 44-моддасига кўра депутатликка номзодлар томонидан ташвиқотни сайловчиларга имтиёзли шартларда товарлар бериш, хизматлар кўрсатиш билан қўшиб олиб бориш тақиқланган.
Шунга қарамай, Халқ депутатлари Тошкент шаҳар кенгаши депутатлигига 38-Олмазор сайлов округидан номзоди кўрсатилган А.М.Аҳмедов 15 декабрда Чилонзор тумани «Катта Чилонзор-1» маҳалла фуқаролар йиғини ва 16 декабрда «Катта Чилонзор-2» маҳалла фуқаролар йиғини ҳудудида ўтказилган ярмаркаларда иштирок этиб, «Ўзлидеп» логотипи жойлаштирилган пештахталар орқали раҳбарлигидаги ташкилот томонидан ишлаб чиқарилган ун ва ёғ маҳсулотини сайловчиларга имтиёзли арзонлаштирилган нархда сотиш хизматини кўрсатган ҳамда сайловчилар билан учрашиб, сайловолди ташвиқотини олиб борган.
У ўз ҳаракатлари билан Маъмурий жавобгарлик тўғрисидаги кодекснинг 515-моддасида назарда тутилган маъмурий ҳуқуқбузарликни содир этган. Ҳолат юзасидан А.М.Аҳмедовга нисбатан МЖтКнинг 515-моддаси билан маъмурий жавобгарлик тўғрисида иш қўзғатилиб, тўпланган ҳужжатлар мазмунан кўриб чиқиш учун маъмурий ишлар бўйича Чилонзор туман судига юборилган.
Изоҳ (0)