Истанбулда Ўзбекистон Туризмни ривожлантириш давлат қўмитаси вакиллари меҳмонхона бизнеси билан шуғулланувчи Туркиянинг Elite World Hotels компанияси бошқаруви кенгаши раиси Жўшқун Элик (Coşkun Elik) билан учрашишди, деб хабар бермоқда Туризмни ривожлантириш давлат қўмитаси.
Учрашувда қўмита мутахассислари томонидан Ўзбекистонда ўтказилаётган ислоҳотлар, туризм соҳасини ривожлантириш учун яратилаётган шароитлар ва давлат томонидан берилаётган имтиёзлар ҳақида маълумот берилди.
Шунингдек, Жўшқун Элик Тошкент шаҳридаги «Чорсу» меҳмонхонаси биносида 5 юлдузли меҳмонхона ташкил қилишга қизиқиш билдирди. Мазкур лойиҳани кўздан кечириш ва унга инвестиция киритиш масаласида музокара ўтказиш учун компания раҳбарининг Ўзбекистонга ташриф буюриши режалаштирилмоқда. Учрашув якунига кўра келгусида ўзаро ҳамкорликни давом эттиришга келишилган.
Эслатиб ўтамиз, 1982 йилда қурилган меҳмонхона аввалига «Москва» номини олган. Ўзининг жойлашган ўрни ҳамда тенги йўқ дизайни билан тез орада бино шаҳар тимсолига айланган. 2000 йиллар бошида меҳмонхона таъмирлаш учун ёпилган. Меҳмонхонанинг янги кўриниши суратлари ҳам пайдо бўлган. Бироқ таъмирлаш ишлари вақти-вақти билан тўхтаб қолган. Бу вақт мобайнида бино реклама баннерлари учун қулай жойга айланди.
Бир неча йиллардан буён вайрона аҳволда бўлган «Чорсу» меҳмонхонаси 2019 йили ишга туширилиши ҳақида 2018 йилнинг май ойида хабар берилган. Реконструкция ишлари билан туркиялик инвестор Аҳмет Демир шуғулланиши айтилган. Кейинроқ Аҳмет Демир меҳмонхонани реконструкция қилиш ишлари суст кетишида Тошкент шаҳар ҳокимлигини айблаган, туркиялик ишбилармоннинг мазкур эътирозларига Тошкент шаҳар ҳокимлиги мутасаддилари жавоб қайтарганди.
Вазирлар Маҳкамасининг 2019 йилниг 16 сентябридаги қарорига мувофиқ собиқ «Чорсу» меҳмонхонаси бошланғич 1 сўм қийматида қайта сотувга қўйилган.
Изоҳ (0)