Жорий йилнинг август ойида «Дарё» нашрида жигар циррозига чалинган сурхондарёлик Феруза Рамазонова ҳақида мақола эълон қилинганди. Унда 35 ёшли 2-гуруҳ ногирони бўлган аёлнинг 21 йилдан бери қанд касали ва жигар циррози билан оғриб келаётганлиги, умри оз қолгани, фақат операция билангина омон қолиши мумкинлиги ҳақида сўз юритилганди. Жигар трансплантацияси бўйича Ҳиндистонда ўтказиладиган операция учун 32 минг доллар керак эди.
Етарли маблағ йиғилмагач, Феруза Рамазонова Facebook орқали Президент Шавкат Мирзиёевга мурожаат йўллаган.
Президентнинг Сурхондарёга ташрифи арафасида эълон қилинган бу мурожаатга тез орада вилоят ҳокимлиги ўз муносабатини билдирганди. Унда бемор керакли ҳужжатларни тақдим этганидан сўнг вилоят ҳокимлиги ва ҳомийлар томонидан операцияга зарур бўладиган сумма тўлаб берилиши айтилган эди.Бемор Феруза Рамазонованинг барча айтилган ҳужжатлар ҳокимликка тақдим қилинса-да, масъуллар ваъдасини ҳалиям бажармаётганлигини «Дарё»га маълум қилди.
Даво истаб, бормаган жойим қилмаган муолажам қолмади. Кун сайин аҳволим оғирлашиб бораверди. Ҳаётимни сақлаб қолиш учун охирги чора жигар трансплантацияси эди. Сўраб суриштирсам, операция қилиш учун энг арзон жой Ҳиндистон экан. Шундан кейин у ердаги «Жайпи» клиникасига тиббий хулосаларни юбордим. Шифокорлар ташхисларни кўриб, операция қила олишларини, 32 минг доллар кераклигини айтишди.Онам билан ёлғиз яшайман. Бунга имконим етмасди. Шу боис ёрдам сўраб, турли ОАВларга чиқдим. «Daryo.uz», «Kun.uz», «Севимли» ва «MY5»да эълон қилинган хайрия материалларидан 9 минг долларга яқин маблағ йиғилди, холос. Пул сўрамаган кишим қолмади. Охири ёрдам сўраб интернетда Президентимизга мурожаат қилдим. Мурожаатим ижтимоий тармоқларда анча шов-шув бўлди. Сайтларда эълон қилинди. Шундан кейин вилоят ҳокимлиги ва соғлиқни сақлаш ходимлари уйимга келиб соғлиғимни текширишди, шароитимни ўрганишди.
Мен қайта текширувдан ўтиб, донор жигар кўчириб ўтказиш учун мос келиши тўғрисида тиббий хулоса олиб бориб берганимдан кейин вилоят ҳокимлиги белгиланган сумма тўлаб берилишига ваъда берди. Мен «Жайпи» клиникасидан барча керакли ҳужжатларни уларга 10 октябрь куни тақдим этдим. Ҳисоб рақамимга 50 миллион сўм ўтказиб беришди. Лекин қолгани ҳалигача берилгани йўқ. Қанча сўрадим, улар «пул бердик-ку» дейишяпти. Ахир бу пул билан Ҳиндистонга бориб, операция қилиб бўлмайди-ку. Хайрияда йиғилганлар ва ҳокимлик берган 50 миллион сўм пул билан қўлимда ҳозир 13 минг 700 доллар атрофида пул бор. Операция учун яна 18 минг доллар керак. Дорилар билан зўрға юрибман. Ҳокимликдагилар эса бирор мурожаатимга жавоб бермаяпти. Мен Президентимизга мурожаат қилган пайтда уларнинг вилоятга ташрифи кутилаётганди. Шунинг учун «қилиб берамиз» деб ваъда бериб, ишни босди-босди қилган. Энди ваъдани бажаришга келганда эса улар қўнғироқларимга жавоб бермаяпти.
Феруза Рамазонова
«Дарё» мурожаатга аниқлик киритиш мақсадида дастлаб вилоят соғлиқни сақлаш бошқармаси бошлиғи Бобохон Шукуров билан боғланди. У вазирлик беморларга фақат Ўзбекистон доирасидагина ёрдам бера олиши, хорижда операция қилдириш вазирликнинг ваколатига кирмаслигини айтиб ўтди.
Сурхондарё вилояти ҳокимлиги беморнинг операцияси учун зарур пулларни 100 фоиз тўлаб беришга ваъда бермаганини маълум қилди.
Биз бемор Феруза Рамазонованинг ҳисобига 50 миллион сўм ўтказганмиз. Биз «ҳомийлар ҳисобидан тўлаб бериш чоралари кўрилади» деб айтганмиз. «100 фоиз тўлаб берамиз» демаганмиз. Раҳбарлар билан гаплашиб кўрай, Худо хоҳласа, ижобий ҳал қилишга ҳаракат қиламиз.
Заҳириддин Тўраев, Сурхондарё вилояти ҳокимлиги матбуот хизмати раҳбари
Бир неча кун ўтгандан сўнг Заҳириддин Тўраев «Дарё» билан боғланиб, бу ишга масъул одамни айни пайтда Москвада эканлиги, келса масалани ўзи ҳал қилишини айтди.Бемор Феруза Рамазонованинг операцияси учун ҳозир яна 18 минг доллар керак. Вақт эса ўтиб бормоқда. Биз мутасаддилардан масалага ойдинлик киритишларини кутиб қоламиз.
Хайрия қилмоқчи бўлганлар учун Феруза Рамазонованинг маълумотлари:
Пластик карта орқали: (Click, Payme)Феруза Рамазонова номига очилган
«Қишлоқ қурилиш банк»:86 00 09 04 52 22 31 99
«Қишлоқ қурилиш банк»нинг Феруза Рамазова номига очилган реквизитлари:МФО: 00359 ИНН: 202042186
Корхона ва ташкилотлардан келиб тушадиган маблағлар транзити:23120000 700000 359001
Хорижий давлатлардан маблағ юбориб, ёрдам бермоқчи бўлганлар учун паспорт маълумотлари:Рамазонова Феруза Даминовна
Паспорт рақами: АА 5598810
Телефон рақами:+99890 915 56 84
Хонзодабегим Аъзамова
Изоҳ (0)