Ўзбекистонда ҳар бир терговчи ва суриштирувчи кабинетлари веб камера билан таъминланди. Охирги стандартларга жавоб берадиган 31 та махсус тергов хонаси ташкил этилиб, улар аудио ва видео қайд этиш билан жиҳозланган. Бу ҳақда Ўзбекистон Ички ишлар вазирлиги «Дарё»га маълум қилди.
Хабар берилишича, ички ишлар органларида амалга оширилаётган ислоҳотларда асосий мақсадларидан бири мустақил тергов ва суриштирув тизимини шакллантириш ҳисобланади.
Вазирликнинг қайд этишича, ана шу мақсадни амалга ошириш учун ижтимоий хавфи кичик ва унча оғир бўлмаган жиноятлар бўйича қисқа муддатли суриштирув институти жорий этилди. Бунинг натижасида шу турдаги жиноят ишларини тергов қилиш муддати уч ойдан бир ойга қисқарди.
Тергов жараёнида фуқароларнинг қадр-қимматини камситиш, қийноққа солиш ва таҳқирлаш каби қонунбузилишига йўл қўймаслик мақсадида видеокузатув имкониятидан кенг фойдаланилмоқда.
Бундан ташқари, жиноятга алоқадорликни аниқлаш борасида сўроқ қилиниши мумкин бўлган барча махсус қабулхоналар, реабилитация марказлари, вақтинча сақлаш ҳибсхоналари, тергов ҳибсхоналарига жами уч мингдан ортиқ видеокузатув мосламаси ўрнатилди.
Шу билан бирга ушбу муассасаларда адвокатлар учун видеокузатув воситалари ҳамда эшитиш мосламалари ўрнатилмаган алоҳида хоналар ташкил этилган.
Изоҳ (0)