Фарғона вилояти ҳокими Шуҳрат Ғаниевнинг матбуот котиби Муҳаммаджон Обидов ижтимоий тармоқларда Шуҳрат Ғаниевнинг исм, фамилияси ва суратлари билан очилган профиллар бўйича баёнот берди.
Унинг таъкидлашича, турли ижтимоий тармоқларда номаълум шахслар томонидан Шуҳрат Ғаниев номидан сохта аккаунтлар очилиб, ҳокимнинг номидан фикрлар билдирилмоқда. Бундан ташқари Муҳаммаджон Обидов номидан ҳам сохта профиллар пайдо бўлган.
«Ҳозирги ахборот технологиялари ривожланган даврда ушбу вазиятдан устакорлик билан фойдаланиб, бундай сохта ахборотлар тарқатаётганлар кимлар ўзи?
Биринчидан, улар биргина Фарғона вилояти ҳокими Шуҳрат Ғаниевнинг душмани эмас, улар ривожланиш йўлида шахдам қадамлар билан одимлаётган Ўзбекистоннинг душманлари. Улар давлат идоралари раҳбарларига халқни қарши қўйиш, гиж-гижлаш ва юртимизда нотинчликни келтириб чиқаришнинг тарафдорларидир.
Иккинчидан, ижтимоий тармоқларда сохта ахборот тарқатувчилар ижрочилар холос. Уларнинг орқасида салоҳиятли мутахасисларга эга бўлган, молиявий жиҳатдан кучли бўлган, таъминланган бошқа сиёсий кучлар бор. Агар мана шу ўйинлар, сохта ахборот тарқатишларнинг орқасида балким ‘Озодлик’ радиоси ҳам турган бўлса, мен ҳеч қачон таажжубланмаган бўлар эдим», — дейди Муҳаммаджон Обидов.
Изоҳ (0)