Ғузорнинг «Шўртан» футбол клуби раҳбари бошқарувидаги Malibu, Lacetti, клуб ихтиёридаги Matiz ҳамда автобус қарздорлик туфайли МИБ ходимлари томонидан ҳатловдан ўтказилди. Бу ҳақда «Дарё»га МИБнинг Қашқадарё вилояти бошқармаси Ахборот хизмати раҳбари Гулноза Дилмуродова маълум қилди.
Хабарга кўра, жамоанинг солиқлардан қардорлиги 470 миллион сўмни ташкил этади.
Қарши туманлараро иқтисодий судининг 2019 йил 7 сентябрдаги ижро варақасига асосан клуб зиммасида 110 миллион 663 минг 983 сўм қарздорлик мавжуд бўлган. 2019 йил 27 сентябрдаги ижро варақасида ушбу маблағга 358 миллион 344 минг 98 сўм қўшилган ва футбол клубининг қарздорлиги қарийб 470 миллион сўмга етган.
«Огоҳлантиришларга қарамай, клуб қарздорликни бартараф этмади, оқибатда Мажбурий ижро бюроси Қашқадарё вилояти бошқармаси томонидан мажбурий тартибда ундириш белгиланди», — дейилади бошқарма ахборот хизматининг хабарида.
17 декабрь, сешанба куни клуб раҳбари бошқарувидаги Malibu ва Lacetti русумидаги автомобиллар, шунингдек, Matiz ҳамда автобус МИБ вакиллари томонидан ҳатлаб олинган.
Клуб Бюро томонидан белгиланган муддатда қарздорликни бартараф қилмаса, машиналар аукционда сотилади ва тушган пуллар қарзни қоплашга сарф этилади.
Изоҳ (0)