Тошкент шаҳар ИИББ фуқаро Амир Шарифуллин (1984 йилда туғилган) томонидан интернетда эълон қилинган мурожаат бўйича текширувни бошланди.
«Текширув натижалари ҳақида маълум қилинади. Турли хулосалар чиқармасдан, текширув натижаларини ва Тошкент шаҳар ИИББ матбуот хизматининг расмий хабарини кутишингизни сўраймиз», — дейилади хабарда.
16 декабрь куни AsiaTerra сайтида Тошкент шаҳрида истиқомат қилувчи 35 ёшли Амир Шарифуллин икки нафар номаълум шахс томонидан ўғирлаб кетилгани ва камера қаршисида уни «кечирим сўрашга» мажбур қилишгани, шундан сўнг, калтаклашгани ҳақида мақола эълон қилинган.
«Яқинда Тошкент ҳокими Жаҳонгир Ортиқхўжаевнинг журналистлар ва блогерларни олти сония ичида таксига ўтирғизиб, гей билан қучоқлаштириб расмга тушириши, уни таҳқирлаши ҳатто чўктириб юбориши мумкинлиги ҳақидаги таҳдидларини ҳамма эслайди. Буларнинг ҳаммаси шунчаки гаплар эмас эди, чунки мени ўзларини Давлат хавфсизлик хизматининг ходими деб таништирган одамлар олиб кетишди ва кейин Ортиқхўжаев ваъда берганидан бир нарса юз берди», — дейди Амир.
Унинг сўзларига кўра, Амир Шарифуллин ўзининг ўғирлаб кетилишига нима сабаб бўлганини билмайди. У Facebook’да турли мавзулар остига изоҳ қолдириб юрган.
«Унинг ўғирлаб кетилиши Facebook’даги 20 минг одамни ўзида жамлаган ‘Ташкент—СНОС’ гуруҳи администратор бўлган онаси — Фарида Шарифуллинга босим ўтказиш мақсадида ҳам амалга оширилган бўлиши мумкин. Гуруҳнинг мақсади бузилишларга оид муаммоларни ёритиш ва одамларга ўз ҳуқуқларини ҳимоя қилиш ҳақида маълумотлар беришдан иборат», — дейилади нашр хабарида.
Изоҳ (0)