«Зармитан» тилла конидан портловчи моддаларни олиб чиқиб кетишга уринган фуқарога суд ҳукми ўқилди

Навоий кон металлургия комбинати давлат корхонаси тасарруфидаги Жанубий кон бошқармасига қарашли «Зармитан» конидан портловчи моддаларни қонунга хилоф равишда олиб кетмоқчи бўлган фуқарога суд ҳукми ўқилди. Бу ҳақда «Дарё» мухбири Фарҳод Норбўтаев хабар бермоқда.

25 август куни «Зармитан» конининг кон капитал ишлари бўлимида портлатувчи бўлиб ишлаб келган Жўрабек Муҳитдинов ер ости кон ишларида портлатишда фойдаланиш учун наряд варақаси асосида ишониб топширилган портловчи моддаларни қонунга хилоф равишда олиб кетаётган вақтида кон маъмурий биносининг кириш қисмида ушланган.

Маълумотларга кўра, 2019 йилнинг март ойидан буён «Зармитан» конининг кон капитал ишлари бўлимида портлатувчи бўлиб ишлаб келган Жўрабек Муҳитдинов 4 дона портловчи моддаларни ҳамда портловчи моддаларни ҳаракатга келтирувчи 2 дона капсюл-детонатор воситаларини олиб кетмоқчи бўлган.

Аниқланишича, Жўрабек Муҳитдинов лавозим йўриқномасига кўра, ўзи қабул қилиб олган портловчи моддаларни доимий назорат остига олиши, уларни бегона кишиларга берилиши, йўқолиши, ўз-ўзидан йўқ бўлиб кетиши ёки қазилма жойларида, ер юзаларида қолиб кетиши, портловчи моддаларни керакли мақсадларда ишлатиши, шунингдек, портлатиш ишлари тугаганидан кейин ишлатилмаган портловчи модда қолдиқларини омборхонага ўз вақтида топшириши ва наряд-йўлланмага уларнинг сарфини тасдиқлаб, аниқ кўрсатилиши учун жавобгарлик белгиланган.

Жиноят ишлари бўйича Қўшработ туман суди судьяси Илҳом Ғуломовнинг маълум қилишича, Жўрабек Муҳитдинов Жиноят Кодексининг 247-моддаси («Ўқотар қурол, ўқ-дорилар, портловчи моддалар ёки портлатиш қурилмаларини қонунга хилоф равишда эгаллаш») 2-қисмининг «в» банди билан айбли деб топилиб, 3 йил муайян ҳуқуқдан, яъни НКМК ДКга қарашли конларда портлатувчи вазифасида ишлаш ҳуқуқидан маҳрум қилиниб, 5 йил озодликни чеклаш жазоси тайинланган.