Шўрчидаги мактабга япон олими Кюдзо Като номи берилди

Ўзбекистон Президенти Шавкат Мирзиёевнинг Японияга расмий ташрифи арафасида Сурхондарё вилояти Шўрчи туманидаги 43-умумий ўрта таълим мактабига япониялик археолог Кюдзо Като номи берилди. Шу муносабат билан ташкил этилган тадбир жорий йилнинг 17 декабрь куни ўтказилди. Бу ҳақда Ўзбекистон Халқ таълими вазирлиги хабар берди.

Маълум қилинишича, маросимда Ўзбекистон халқ таълими вазири ўринбосари Дилшод Кенжаев, Япониянинг Ўзбекистондаги элчихонаси ҳамда жамоатчилик вакиллари иштирок этган.

Вазирлик томонидан таъкидланишича, Кюдзо Като археолог, антрополог, тарихчи ва этнограф бўлган. У Ўзбекистоннинг тарихи ва қадимий обидаларини ўрганган. Археолог узоқ йиллар давомида Ўзбекистон фанлар академияси билан ҳамкорлик олиб борган. Сурхондарё вилоятидаги Далварзинтепа, Қоратепа, Холчаён, Фаёзтепа археологик қазишмаларида қатнашган.

«Дунё» ахборот агентлигининг маълум қилишича, 2020 йилда Ўзбекистонда Кюдзо Като номидаги ёдгорлик комплекси ва музей ташкил қилинади.

Олим Ўзбекистон тарихини Японияда оммалаштирган. Шунингдек, у Марказий Осиё ва Сибир ҳақидаги ўнлаб китобларнинг муаллифи. Ўзбекистонга бағишланган турли симпозиум ва кўргазмаларни ташкил этган. Амир Темур, Бобур, Мирзо Улуғбек ва бошқа улуғ мутафаккирлар асарларини япон тилига таржима қилган. Марказий Осиёда, айниқса Ўзбекистон жанубида буддизм маданиятини ўрганган.

2002 йилда ўзбек халқининг бой тарихи, қадимий ёдгорликлари ҳамда маданий-маънавий меросини чуқур ўрганиш ва хорижда тарғиб қилишдаги катта хизматлари, Ўзбекистон ва Япония ўртасидаги илмий алоқаларни ривожлантиришга қўшган самарали ҳиссаси учун Кюдзо Като «Дўстлик» ордени билан мукофотланган.

Дилшод Кенжаевнинг сўзларига кўра, 2020/2021-ўқув йилидан бошлаб Кюдзо Като номидаги мактаб ўқувчилари инглиз тили билан бирга япон тилини ҳам ўрганиш имкониятига эга бўлади. Бу мактаб кейинги ўқув йилидан бошлаб япон ва инглиз тилларига ихтисослаштирилган ёш археологлар мактабига айлантирилади.

Шу билан бирга, мактабда Като Кюдзо музей-хонаси ташкил этилади. Бу ерга ташриф буюрганлар япониялик олим ҳаёти ва фаолияти билан танишиш имкониятига эга бўлади.

Вазирлик томонидан қайд этилишича, жорий йилнинг август ойида қабул қилинган Вазирлар Маҳкамасининг «Умумий ўрта таълим муассасаларида хорижий тилларни ўқитишни янада такомиллаштириш чора-тадбирлари тўғрисида»ги қарорига кўра, республиканинг барча ҳудудларида 15 та япон тилига ихтисослаштирилган давлат умумтаълим муассасаси ташкил этилади. 2020/2021-ўқув йилидан бошлаб бешта мактабда япон тили ўқитилади.