Етказиб берилган энергия ва сув таъминоти, сув чиқариш, қаттиқ маиший чиқиндиларни тўплаш ва олиб чиқиб кетиш хизматлари учун қарздорлик, шунингдек, суд ва бошқа орган ҳужжатларининг ижросини таъминлаш соҳасида қарздор жисмоний шахсларнинг ҳисоб рақамларини блоклаш ва ҳисобдан чиқариш амалиёти вақтинча тўхтатилди.
Бундан ташқари, турли шаклдаги қарздорликни ихтиёрий тўлов муддатида амалга оширмаганлик учун шахснинг банкдаги ҳисоб рақамини (пластик карта ҳисоби) блоклаб қўйиш амалиёти ҳам 2020 йилнинг 1 июлигача тўхтатилди.
Бу ҳақда Мажбурий ижро бюроси ва Марказий банк вакиллари иштирокида бўлиб ўтган «Жисмоний шахсларнинг ҳисоб рақамларига қўйилаётган тақиқ масалалари» мавзусидаги брифингда маълум қилинди, дея хабар бермоқда «Дарё» мухбири.
Матбуот анжуманида ҳозирда МИБ Марказий банк ва бошқа ташкилотлар билан ҳамкорликда жисмоний шахсларнинг пластик карточкаларига тақиқ қўйиш ва «блокдан» чиқариш масалаларини янада такомиллаштириш юзасидан чора-тадбирлар ишлаб чиқилаётгани маълум қилинди. Бунда автоматлаштирилган электрон платформ йўлга қўйилиши яъни қарздорлик бартараф қилингач, тақиқ электрон тарзда ечилиб, фуқаролар турли инстанция, идора ва ташкилотларга мурожаат қилиб сарсон бўлмаслиги таъминланади.
Яна бир янгилик — халқаро аэропорт ва темирйўл вокзалларида фуқароларнинг қарздорлик ҳақида маълумотга эга бўлган заҳоти уни жойида бартараф қилиш имконияти яратилади.
«Айни пайтда Банк муассасалари билан қарздорларнинг банкдаги банд солинган маблағларини қарздорлиги учун мутаносиб равишда ечиб олиш бўйича таклиф ишлаб чиқилмоқда. Фуқароларнинг ҳисоб рақамлари (пластик карточкалари)га тақиқ қўйишда қонунбузилишига йўл қўйган ёки белгиланган тартибга амал қилмаган МИБ ва банк ходимларига нисбатан қатъий жавобгарлик масаласи ҳам кўрилмоқда.
МИБ масъул ходимлари томонидан Бюро, банк муассасалари ва бошқа ҳамкор ташкилотлар ўртасидаги электрон ахборот алмашиш тизими интеграциялашуви, шунингдек, банклар томонидан жисмоний шахсларнинг Ягона идентификация тизими йўлга қўйилгунига қадар суд ҳужжатлари ва бошқа органлар ҳужжатлари бўйича қарздор жисмоний шахсларга хизмат кўрсатадиган банк ҳисоб рақамларига тақиқ қўйилишида муаммолар кузатилса, бунга боғлиқ масалалар бўйича «1107» қисқа рақамли ишонч телефонига мурожаат этиш лозим», — дейди МИБ матбуот хизмати раҳбари Фаррух Тошпўлатов.
Изоҳ (0)