Пасха оролидаги тош ҳайкаллар қадимги Полинезия аҳолиси улар ер маҳсулдорлигини сақлашга ёрдам беришига ишонгани туфайли ўрнатилган бўлиши мумкин. АҚШ, Янги Зеландия ва Чили археологлари ҳамда тупроқшунослари гуруҳи шундай хулосага келди, дея хабар беради «РИА Новости».
Таҳлиллар давомида мутахассислар оролнинг шарқий қисмидаги Рано Рараку вулқони яқинида ўрнатилган икки монолит ҳайкални ўрганди. Тадқиқот муаллифи Жоанна Ван Тилбургга кўра, уларни барпо этишдан мақсад орол ерлари маҳсулдорлигини ошириш бўлганининг илмий далиллари топилди.
Рано Рараку ёнидаги тупроқнинг кимёвий таҳлили унинг таркиби юқори ҳосил учун керакли бўлган фосфор ва калций элементларига бой эканлигини кўрсатди. Бу эса, ўз навбатида, олимларга вулқон яқинидаги ҳудуд маҳаллий аҳоли учун нафақат тошлар, балки қишлоқ хўжалигини юритиш учун зарур маҳсулдор тупроқ манбаси ҳам бўлгани ҳақида хулоса қилишга имкон берди.
Изоҳ (0)