Philip Morris International ва Tashkent Tobacco МЧЖ халқаро етакчи тамаки компаниялари ўртасида тузилган икки томонлама келишув доирасида бутун дунёга машҳур Marlboro, Parliament ва L&M савдо белгиси остидаги тамаки маҳсулотларини лицензия асосида ишлаб чиқариш йўлга қўйилди.
Бугунги кунда ҳамкорлар халқаро стандарт сифатига мувофиқ келадиган корхонанинг қурилиш-монтаж ишларига, шунингдек, заводни Германия ва Италия ишлаб чиқарувчиларининг илғор ускуналари билан жиҳозлаш учун биргаликда сармоя киритди. Биринчи йил давомида ишлаб чиқариш кучининг йиллик ўсиб боришини инобатга олган ҳолда, 500 миллион дона тамаки маҳсулоти ишлаб чиқариш режалаштирилган. Tashkent Tobacco’нинг ҳисоб-китобларига кўра, 2020 йилда ушбу ишлаб чиқариш бошланганидан сўнг мамлакат бюджетига қўшимча 130,2 миллиард сўмдан ортиқ солиқ ва бошқа мажбурий тўловлар тўланади.
Заводда ишлаб чиқариладиган тўпламлар Ўзбекистон Республикаси қонунларига ҳамда бутун дунё бўйлаб Philip Morris International заводларида қўлланиладиган хавфсизлик стандартларига қатъий мувофиқ бўлади. Ишлаб чиқарилган тамаки маҳсулотларини назорат қилишни таъминлаш мақсадида Tashkent Tobacco МЧЖ қўшимча равишда синов лабораторияси ва ишлаб чиқаришнинг барча босқичларида маҳсулотларнинг сифатини назорат қилиш учун инновацион ускуналар билан жиҳозланган.
«Компаниямиз хорижий сармоядорларни ҳамкорликка таклиф қилиш орқали мамлакатнинг инвестицион салоҳиятини ривожлантиришга ҳисса қўшган дастлабки корхоналардан бирига айланди. Компанияда беш кунлик иш жадвалига эга иш ўринлари яратилган бўлиб, ходимларни овқатлантириш ва уларни ташиш ҳам таъминланади. Шунингдек, навбатдаги қадам сифатида, биз дастлабки бир неча йил ичида дистрибуция тармоғини ривожлантириш ва 3000 дан ортиқ чакана савдо нуқтасини замонавий савдо ускуналари билан жиҳозлаш бўйича инвестиция лойиҳасини амалга оширишни режалаштирмоқдамиз. Бу, ўз навбатида, чакана бизнеснинг ривожланишига ва янги иш ўринларини яратишга хизмат қилади», — деб таъкидлади Tashkent Tobacco МЧЖ таъсисчиларидан бири Али Гожиев.
Philip Morris International компанияси мутахассислари Tashkent Tobacco МЧЖ базасига техник кўмак кўрсатади. Шунингдек, Қозоғистондаги Philip Morris International ишлаб чиқариш заводида ва тўғридан-тўғри Тошкентдаги заводда маҳаллий ходимларни ўқитиш ва ривожлантириш комплекс дастури режалаштирилган.
Маълумот учун, Tashkent Tobacco МЧЖ 2005 йилда рўйхатдан ўтган ва тамаки маҳсулотларини ишлаб чиқарувчи корхона ҳисобланади. Заводда 100 нафардан зиёд ходим ишлайди. Бугунги кунда компания халқаро етакчи компаниялар билан узоқ муддатли ишбилармонлик муносабатларига эга. Тўлиқ бўлмаган икки иш йили давомида Tashkent Tobacco МЧЖ бюджетга 20 миллион АҚШ долларидан зиёд миқдорда солиқ тўлади (шундан 14 миллион доллар жорий йилнинг 11 ойи учун).
Изоҳ (0)