Россия 4 йилга Олимпиада ва барча турдаги Жаҳон Чемпионатларидан четлатилди

Бутунжаҳон антидопинг агентлиги (WADA) ижроқўми Россияни тўрт йилга катта мусобақалар, шу жумладан, Олимпиада ва Жаҳон Чемпионатларидан четлатди.

9 декабрь, душанба куни Лозаннада РУСАДА (Россия антидопинг агентлиги) масаласи бўйича WADA ижроиа қўмитасининг йиғилиши бўлиб ўтди.

Аввалроқ қўмита РУСАДА мақомини бекор қилиш ва Россияни тўрт йилга халқаро мусобақалардан четлатишни тавсия қилганди. Шунингдек, Россия катта мусобақаларни ўзида қабул қилишига ҳам тақиқ қўйилган. Россиялик амалдорлар Олимпия ўйинлари ва бошқа катта мусобақаларга бора олмайди. Бундан ташқари, Россия жаримага тортилади.

Допинг назоратидан ўтган россиялик спортчилар Олимпия ўйинларига бориши мумкин, бироқ улар фақат нейтрал мақомда (мадҳия ва байроқсиз) иштирок этади.

Москва антидопинг лабораториясидаги 2012—2015 йилги маълумотлар базаси текширувдан ўтказилгач, шундай санкция қўллаш қарорига келинган. Экспертларнинг хулосаларига кўра, базадаги маълумотлар спортчиларнинг ижобий допинг намуналарини яшириш мақсадида ўзгартирилган.

Россия томони WADA қарори устидан 21 кун ичида апелляция бериш ҳуқуқига эга.

Маълумот учун, WADA’нинг мазкур тақиқи футбол бўйича Россия терма жамоасининг 2020 йилги Европа Чемпионатидаги иштирокига таъсир қилмайди. Сабаби УЕФА ташкилоти WADA’га тўғридан-тўғри бўйсунмайди. Бироқ Россия футбол терма жамоаси ЖЧ—2022 мусобақасида иштирок эта олмаслиги мумкин. Чунки ФИФА бутунжаҳон антидопинг агентлиги билан ҳамкорлик қилади.