Ижтимоий тармоқларда Самарқанд вилояти Ургут туманидан йўлланган мурожаатда, Ҳ.Х. исмли фермер ҳеч кимга тинчлик бермаслиги ва ҳамма билан жанжаллашиши, бирон маротаба жавобгарликка тортилмаганлиги, ҳар доим юқори лавозимда ишлайдиган танишларини ишга солиб «сувдан қуруқ чиқаётганлиги», бу эса ўз навбатида аҳоли орасида норозигарчиликларга сабаб бўлаётганлиги ҳақида пост қолдирилган. Ушбу ҳолат Ўзбекистон Республикаси ИИВ ҳузуридаги Тергов департаменти томонидан ўрганиб чиқилди.
Аниқланишича, Самарқанд вилоят Ургут туман «Ўроқбойжар» маҳалласида ҳақиқатан ҳам 63 ёшли Ҳ.Х. исмли фермер яшаб келаётганлиги, у анча вақтдан буён бир ер майдони бўйича ўзининг маҳалладоши 44 ёшли Б.Э. билан жанжаллашиб келаётганлиги маълум бўлган.
13 ноябрь куни тахминан соат 19:30 ларда Ҳ.Х. ўзининг ўғли 26 ёшли О.Х. билан биргаликда, Ургут туман «Ўроқбойжар» маҳалласи ички йўлида, маҳалладоши 44 ёшли Б.Э билан навбатдаги жанжал вақтида, 26 ёшли О.К. қўлидаги ёғоч калтак билан Б.Э.нинг танасини турли жойларига уриб, тан жароҳати етказган.
Фуқаро Б.Э. олган тан жароҳатлари юзасидан Ургут туман тиббиёт бирлашмасига мурожаат қилган. Ўтказилган судга оид тиббий экспертизанинг хулосасига кўра Б.Э. оғир тан жароҳати олганлиги кўрсатилган.
Мазкур ҳолат юзасидан Ургут туман ИИО ФМБ ҳузуридаги тергов бўлими томонидан Жиноят кодексининг 105-моддаси 1-қисми (қасддан баданга ўртача оғир шикаст етказиш) билан жиноят иши қўзғатилган ҳамда экспертиза хулосаси олинганидан кейин жиноят иши ЖКнинг 104-моддаси 1-қисми (қасддан оғир тан жароҳати етказиш) га қайта малакаланган.
Шу тариқа интернет тармоғига жойлаштирилган маълумот ҳақиқатга тўла мос келмаслиги аён бўлди. Қонунга хилоф равишда ижтимоий хавфли қилмиш содир қилган ҳар қандай шахс жавобгарликка тортилиб, жазонинг муқаррарлиги таъминланади. Ҳозирда мазкур жиноят иши бўйича дастлабки тергов ҳаракатлари давом эттирилмоқда.
Изоҳ (0)