«Ўзтемирйўлйўловчи» компаниясининг Халқаро йўналишда йўловчиларга хизмат кўрсатиш филиали вагон кузатувчисига нисбатан товламачилик қилган шахсга нисбатан жиноят иши очилди. Бу хақда Транспортда хавфсизликни таъминлаш бош бошқармаси Тошкент минтақасидаги темирйўл транспортида хавфсизликни таъминлаш бошқармаси тергов бўлими бошлиғи подполковник Шерзод Холмуротов «Дарё»га маълум қилди.
Аниқланишича, «Москва—Тошкент» йўналишидаги поездда оила аъзоларини Ўзбекистон жўнатмоқчи бўлган фуқаро Р.Х. Москва шаҳридаги темирйўл вокзалида вагон кузатувчиси А.Б.дан белгиланган меъёрдан ортиқ юкларини олиб кетишни талаб қилган. А.Б. эса унинг ҳаракатлари ноқонунийлигини, меъёрдан ортиқ юк учун қўшимча тўлов квитанцияси расмийлаштириш лозимлигини тушунтиради ва ортиқча юклари орасидаги ҳажми жуда катта бўлган телевизорни вагондан тушириб қолдиради.
Фуқаро Р.Х. Ўзбекистонга қайтиб келгач, вагон кузатувчиси А.Б.ни иш жойига келиб, унга гўёки телевизори Москва шаҳрида қолиб кетганлигини айтади. Ундан телевизор пулини тўлаб беришни, бир миллион сўм талаб қилади. Акс ҳолда юқори идораларда ишловчи танишлари орқали уни ишдан бўшаттиришини, ОАВ ёки ижтимоий тармоқларга чиқартириб шарманда қилишни айтади. Вагон кузатувчиси эса гўёки ушбу талабга рози бўлиб, ўша заҳотиёқ ҳуқуқни муҳофаза қилувчи идораларга мурожаат қилади.
Транспортда хавфсизликни таъминлаш бош бошқармаси Тошкент минтақасидаги темир йўл транспортида хавфсизликни таъминлаш бошқармаси тезкор ходимлари томонидан ўтказилган тезкор тадбир натижасида Тошкентдаги савдо марказларидан бирининг олдида фуқаро Р.Х. вагон кузатувчиси А.Б.дан бир миллион сўмни олган вақти ушланган. Тергов бўлими томонидан фуқаро Р.Х.га нисбатан Жиноят Кодексининг 165-моддаси (товламачиик) билан жиноят иши қўзғатилган.
Изоҳ (0)