Ўзбекистон Республикаси Конституцияси куни арафасида Тошкент шаҳар ИИББда хизмат бурчини бажариш чоғида ҳалок бўлган ходимларга хотира ёдгорлиги очилди, деб хабар берди пойтахт ИИББ матбуот хизмати.
Тадбирга ички ишлар органлари фахрийлари, ҳалок бўлган ходимларнинг оила аъзолари таклиф этилди.
Ёдгорлик тахтасига ҳалок бўлган қаҳрамонларнинг расмлари туширилган ҳамда исмлари ёзилган.
Тошкент шаҳар ИИББ бошлиғи, генерал майор Рустам Жўраев тадбир иштирокчиларини Конституция қабул қилинганининг 27 йиллиги билан табриклаб, жиноятчиларга қарши курашда қаҳрамонларча ҳалок бўлган ҳамкасбларини ёд этиш — Тошкент шаҳар ИИББ ходимларининг ҳозирги ва кейинги авлодларининг муқаддас бурчи эканлгини таъкидлади.
Аввалроқ ёдгорлик тахтасига мустақиллик йилларида хизмат вазифасини адо этаётганида ҳалок бўлган 28 нафар ҳарбийнинг исм-фамилияси ёзилган эди. Реконструкциядан сўнг яна тўрт нафар ҳарбийнинг исми қўшилди. Булар 1988 йилда «Уч қаҳрамон» постида ҳалок бўлган қидирув бўлими катта лейтенанти Маткарим Матчонов, ЙПХ инспекторлари Муса Ҳошимов ва Олимжон Асқаров, 1989 йилда Фарғонада хизмат сафари вақтида мардонавор ҳалок бўлган Тошқул Сувонқуловлардир.
Тадбир иштирокчилари марҳумлар хотирасига ҳурмат бажо келтириб, Мотамсаро она ҳайкали пойига гуллар қўйди.
Изоҳ (0)