Тошкентнинг Миробод ва Сергели туманларининг айрим ҳудудларида иссиқлик таъминотида узилиш содир бўлди, деб хабар бермоқда пойтахт ҳокимлиги.
Қайд этилишича, бунга 5 декабрь куни соат 02:45 да Миробод туманида жойлашган 6-сонли қозонхонадан таъминланувчи 600 диаметрли магистрал иссиқлик тармоғида авария содир бўлгани сабаб бўлган.
Мавжуд иссиқлик қувури муддатини ўтаб бўлганлиги сабабли ҳозирда унинг таъмирталаб қисми янгисига алмаштирилмоқда. Мазкур узилишларни тезкорлик билан бартараф этишга зарур техникалар ва мутахассислар жалб этилган.
Ҳокимлик юзага келган ноқулайликлар учун узр сўраб, бугун соат 14:00 да аҳоли хонадонлари яна иссиқлик тизимига уланишини маълум қилган.
Кеча, 4 декабрь куни Тошкентда иссиқ сув қувурларининг ёрилиши оқибатида Шайхонтоҳур, Чилонзор ва Учтепа аҳолисининг бир қисми иссиқлик таъминотисиз қолган эди. Шайхонтоҳур туманининг Белтепа даҳасида сув қувури ёрилиб, иссиқ сув дарё бўлиб оқаётгани акс этган видео ижтимоий тармоқларда тарқалган.
Иссиқ сув қувури ёрилиши ҳолати октябрь ойи охирларида Тошкентнинг Нукус-Афросиёб кўчалари чорраҳасида ҳам содир бўлганди.
Изоҳ (0)