Қашқадарё ИИБ ташаббуси билан Деҳқонобод туманининг Обод қишлоғидаги 51-мактабда стадион қуриладиган бўлди. Бу ҳақда вилоят ИИБ раҳбариятининг қишлоқ аҳли билан бўлган мулоқотида маълум қилинди, дея хабар беради «Дарё» мухбири.
Айтилишича, вилоят ИИБ раҳбарияти туманнинг Бозортепа ва Обод қишлоқлари аҳли билан мулоқот ўтказган.
— Гулмурод Бўтаёров исм-шарифли ўқитувчи мактабга стадион ва қўшимча бино кераклигини айтиб мурожаат қилди, — дейди вилоят ИИБ ахборот хизмати раҳбари Ирода Расулова. — Мактабда болалар учун стадион бўлмаган, 10 ва 11-синфлар қайта ташкил этилгани боис қўшимча ўқув бинога ҳам эҳтиёж сезилган. Бошқарма бошлиғи ўринбосари шу ернинг ўзида туман ҳокими ўринбосари Соҳиб Самадов билан маслаҳатлашиб, 2 ой муддат ичида мактаб учун стадион қуриб берилишини айтди. Стадион қурилишини ўз назоратига олишини таъкидлади. Мактаб учун қўшимча бинони 2020 йилги давлат дастурига киритиш ҳақида туман халқ таълими бўлими раҳбарияти билан келишилди.
— Стадион учун давлат маблағ ажратиб беришини кутиб ўтирмасдан, туман ва вилоят имкониятидан келиб чиқиб, ўзимиз ҳаракат қиламиз, — деди бошқарма бошлиғи ўринбосари Фахриддин Раҳматов. — Грейдер ва керакли жиҳозларини берамиз, маҳалла аҳли эса ҳашар қилиб, фарзандлари учун стадион қурилишига бош-қош бўлади. Насиб этса, икки ой муддатда болалар мактаб стадионида футбол ўйнайдиган бўлади.
Мурожаатчи Муҳриддин Раҳимқуловга мактаб ёнида кутубхона ва тикувчилик цехи очиш учун имтиёзли кредит ажратиладиган бўлди.
ИИБ матбуот хизматининг маълумот беришича, ИИБ раҳбарияти ва 3-секторнинг ишчи гуруҳ аъзолари мутасадди давлат идоралари раҳбарлари иштирокида 69 нафар фуқаро билан кўришиб, 12 нафар фуқаронинг 13 та масаласини тинглаган. 2 та муаммо жойида ҳал этилиб, 11 таси масъул ташкилотлар ихтиёрига топширилган.
Изоҳ (0)