Қонунчилик палатасининг 2019 йил 26 ноябрда ўтказилган мажлисида янги таҳрирдаги Солиқ кодекси тўғрисидаги қонун лойиҳаси концептуал жиҳатдан биринчи ўқишда маъқулланган эди.
Парламент матбуот хизматининг хабар беришича, айни пайтда парламент қуйи палатасининг барча қўмиталари, сиёсий партиялар фракциялари ва Ўзбекистон Экологик ҳаракати депутатлар гуруҳи йиғилишларида ҳамда ишчи гуруҳларда мазкур қонун лойиҳаси кенг муҳокамада моддама-модда кўриб чиқилмоқда.
Кодекс лойиҳасида асосий эътибор солиқ қонунчилигини максимал даражада соддалаштиришга, зиддиятлар ва тушунмовчиликларни бартараф этишга, инсофли солиқ тўловчилар манфаатларини ҳимоя қилишга қаратилган бўлса, солиқ органларининг ҳуқуқ ва мажбуриятлари белгиланган ҳолда уларнинг жавобгарлиги ҳам кучайтирилмоқда, дейилади парламент хабарида.
Муҳим ўзгаришлардан бири бу ортиқча тўланган солиқ суммаларининг ўз вақтида қайтарилмагани ёки солиқ суммалари сўзсиз тартибда асоссиз ундирилгани учун Ўзбекистон Республикаси Марказий банкининг қайта молиялаштириш ставкаси миқдорида бюджетдан солиқ тўловчиларга фоиз тўлаш йўли билан солиқ органларининг жавобгарлигини кучайтиришдир.
Қайд этилишича, кодекс лойиҳасида асосий воситалар объектлари, шу жумладан, кўчмас мулк объектлари харид қилинганда (барпо этилганда) қўшимча қиймат солиғи (ҚҚС) бирйўла ҳисобга олинишини назарда тутувчи тартиб жорий этилиши билан солиқни тўлаш тартиблари ҳам соддалаштирилмоқда. Шунингдек, қўшилган қиймат солиғини қайтариб бериш тизими тубдан ўзгартирилди. Яъни, батафсил камерал текширув ўтказилганидан кейин ҚҚС бўйича «манфий» қолдиқ суммасини қайтариш ҳуқуқи тақдим этилади.
Аввалроқ Солиқ кодексининг янги таҳририда тадбиркорларга солиқларни тўлашни кечиктириш ёки бўлиб тўлаш имкони берилаётгани ҳақида хабар берилган эди.
Изоҳ (0)