Наманган вилояти ҳудудида аҳолига электр энергияси таъминотидаги чекловлар тўхтатилди. Бу ҳақда вилоят ҳудудий электр тармоқлари корхонаси директори ўринбосари Сайфиддин Ҳусаинов маълум қилди, дея хабар беради «Дарё» мухбири Азизбек Абдувалиев.
Вилоятда газ ва электр таъминотида узилишлар билан боғлиқ ҳолатлар юзасидан ташкил этилган матбуот анжуманида сўз олган Ҳусаинов жорий йил 1 декабридан аҳолига электр энергияси таъминотида чекловлар тўхтатилганини қайд этиб, узилишлар фақат авария ҳолатларида рўй бериши мумкинлигини таъкидлади.
Бундай вазиятларни бартараф этиш учун тезкор бригада мутахассислари сони 1,5 баробарга оширилган.
Шунингдек, истеъмолчи билан тезкор алоқани ўрнатиш мақсадида келгуси ҳафтадан узлуксиз ишлайдиган Call centre ишга туширилаётгани маълум қилинди.
Маълумот учун, 2018 йил 2 декабрь ҳолатига таққослаганда вилоятда жорий йилда 1 миллион 817 минг киловатт ёки ўртача 800 миллион сўмлик электр энергияси кўп сарфланган.
Изоҳ (0)