Тошкентда ўтган ҳафтада ҳайдовчилар энг кўп қувиб ўтиш қоидаларини бузганлиги аниқланди

Тошкент шаҳар ИИББ матбуот хизмати ўтган ҳафта давомида ЙПХ инспекторлари томонидан қайд этилган ЙҲҚ қоидабузарликлари статистикасини тақдим этди.

«Қиш мавсумида қолган фаслларга қараганда йўл ҳаракати қоидаларига риоя қилиш бўйича талабчанроқ бўлиши мумкин. Масъулиятсиз ҳайдовчиларнинг хатти-ҳаракатлари совуқ ва нам асфалтда ачинарли оқибатларга олиб келиши мумкин», — дейилади хабарда.

25 ноябрдан 1 декабргача бўлган давр ичида йўл ҳаракати қоидалари бузилиши билан боғлиқ 17 786 та фактлар ИИББ ЙҲХБ ЙПХ инспекторлари томонидан қайд этилди, шулардан 3747 таси – қўпол тарздаги қоидабузарликлардир. Ўтган ҳафтада пойтахтда энг кўп кузатилган қоидабузарлик қувиб ўтиш қоидаларини бузиш (1150 та), тўхташ ва тўхтаб туриш қоидаларини бузиш (763 та), светофорнинг тақиқловчи белгисини менсимаслик (401 та) бўлди.

Маълумот учун, Маъмурий жавобгарлик тўғрисидаги кодекснинг 128-моддасига кўра қувиб ўтиш қоидаларини бузиш энг кам ойлик иш ҳақининг иккидан бир қисми миқдорида жарима солинишига сабаб бўлади.