Оҳангарон тумани ҳудудидан ўтувчи «Тошкент—Олмалиқ» автомобиль йўлининг 6-километрида 2 декабрь, душанба куни тахминан соат 05:00 да номаълум шахс бошқарувидаги транспорт воситаси 53 ёшли пиёда А.В.ни уриб юборган. Ҳайдовчи жабрланувчига биринчи тез тиббий ёрдам кўрсатмасдан, уни хавф остида қолдириб ҳодиса жойидан яширинган. Бу ҳақда Ўзбекистон ИИВ ҳузуридаги Тергов департаменти маълум қилди.
Хабар берилишича, олинган жароҳатлари оқибатда А.В. йўл-транспорт ҳодисаси содир бўлган жойида вафот этган.
Ҳодиса содир бўлган жойни кўздан кечириш жараёнида транспорт воситасининг олди бампер қисми ва бошқа бўлаклари олинган.
Мазкур ҳолат юзасидан Оҳангарон туман ИИБ ҳузуридаги Тергов бўлими томонидан Ўзбекистон Республикаси Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 2-қисми (хавф остида қолдириш одам ўлишига сабаб бўлса) билан жиноят иши қўзғатилган.
Олиб борилаётган дастлабки тергов ҳаракатлари жараёнида тегишли экспертизалар тайинланган, ушбу ЙТҲни содир этган транспорт воситаси ва унинг ҳайдовчисини аниқлаш мақсадида тезкор қидирув тадбирлари ўтказилмоқда.
Тергов департаменти ушбу ҳолатга гувоҳ бўлган кишилардан унинг қатнашчилари ҳақида ҳудудий ИИБларга ёки +998707624121, +998707624122, +998712314626 телефон рақамларига хабар беришни сўрамоқда.
Изоҳ (0)