Кун даҳшатлари. Жиззахда маст ҳолда ётган қизни бир неча автомобиль босиб кетди. Марғилон шаҳар ҳокимининг собиқ ўринбосари ўз уйида осилган ҳолда топилди. Бухорода 6 ёшли бола шифохонада вафот этди, унинг синглиси эса комада — сабаб сифатида ис гази кўрсатилмоқда. Тошкентда 25 кунлик чақалоғидан айрилган она шифохона устидан шикоят қилди — вазирлик ҳолат юзасидан текширув бошлади. Мексикада бир кунда рекорд даражада кўп — 127 қотиллик қайд этилди. Самоада оммавий қизамиқ эпидемияси 50 дан ортиқ болани ҳаётдан олиб кетди... Ҳа, кун шундай даҳшатли бўлди.
«Қурилди, бузилди»лар. Хабарингиз бор, Ўзбекистон бўйлаб 2018 йил бошида ёпилган назорат постлари қайта тикланмоқда — шу муносабат билан ИИВ тушунтириш берди ва фуқаролардан «вақтинчалик ўзгаришларни тўғри тушунишни» сўради; кеча оқшомда Tashkent City’даги Конгресс-холл томи қулагани ҳақида хабарлар тарқалган эди — Сити маъмурияти ҳам, шаҳар ҳокимлиги ҳам бу хабарларни рад этди. Жиззахда эса бир неча хонадонни сув босди — ҳаммасига чиқиндилар сабабчи.
Футбол бўйича Ўзбекистон ногирон-ампутантлар терма жамоасини жаҳон чемпионига айлантирган мураббий вафот этди. Рустам Қориев 68 ёшда эди. Ногирон-ампутантлар футболи ва унинг жаҳон чемпионати ФИФА томонидан тан олинмаса-да, Қориев бошчилигидаги жамоа қайд этган тарихий натижалар ҳеч қачон ўз аҳамиятини йўқотмайди.
«Одамийлик» рукнига: Малайзиялик аёлнинг отасидан эсдалик бўлиб қолган купюраси ўғирлаб кетилганидан бир йил ўтиб эгасига қайтарилди. Сурхондарёда «Қизил китоб»га киритилган Бухоро буғуси маҳаллий аҳоли хонадонига кириб қолди — айиқ бўлганида, ким билсин, балки ўлдириб қўйишарди, лекин буғуни ҳозирча Термиз ҳайвонот боғида сақлашмоқда.
Ўқиш қатъий тавсия этилади: Бангладешдаги геноцид, Ҳиндистон ва Покистон ўртасидаги уруш ва Бҳуттонинг расмий узри — Учинчи Ҳиндистон ва Покистон уруши тарихи; 3 декабрь — тарихда биринчи юрак кўчириш операцияси бажарилган сана. Бу юраги хаста минглаб одамларга умид бағишлаган эди; «Telegram’га қараворинг»: Twitter’даги ўзбекистонликлар ўзларига келган сўнгги энг қизиқарли SMS’лар билан бўлишди — буни кўриш керак!
Изоҳ (0)