Республикада 6,3 млрд сўмлик газдан ноқонуний фойдаланиш ҳолатлари аниқланди

«Ўзнефтгазинспекция», Мажбурий ижро бюроси ҳамда «Ҳудудгазтаъминот» АЖ ходимлари ва «Ўзстандарт» агентлиги мутахассислари билан биргаликда табиий газдан ноқонуний фойдаланиш ҳолатларини аниқлаш бўйича тадбир ўтказилди. Тадбир натижасига кўра, 773 та ноқонуний фойдаланиш ҳолати аниқланди. Бу ҳақда «Ўзнефтгазинспекция» «Дарё»га маълум қилди.

Аниқланган ҳолатлар бўйича 8,3 миллион метр куб миқдоридаги табий газдан ноқонуний фойдаланиш қайд этилган. Натижада газ таъминоти корхонасига 6,3 миллиард сўм миқдорида зарар етказилган.

Ушбу ноқонуний фойдаланиш ҳолатларидан бири Тошкент вилоятидаги учта пиштган ғишт ишлаб чиқариш цехида аниқланган. Газ ҳисоблаш ускунасига ташқи таъсир кўрсатилганлиги натижасида газ таъминоти корхонасига жами 2,2 миллиард сўм зарар келтирилганлиги аниқланди.

Маълум қилинишича, улар орасида «Бинокор» МЧЖ раҳбарияти бир неча бор табиий газдан ноқонуний равишда фойдалангани учун жавобгарликка тортилган. Ушбу цех газ таъминоти корхонасига бир неча марта зарар етказган. Сўнгги ҳолат бўйича 1,79 миллиард сўм зарар етказилгани аниқланди.

Шунингдек, «Ўзнефтегазинспекция» томонидан ўтказилган навбатдаги тадбир натижаларига кўра, иссиқхоналарда табиий газдан ноқонуний фойдаланиш бўйича 84 та ҳолат аниқланди. Ноқонуний фойдаланилган газ ҳажми 2,17 миллион метр кубни, етказилган зарар миқдори эса 2,18 миллиард сўмни ташкил этган.

Табиий газдан ноқонуний фойдаланиш бўйича 16 та (пиштган ғишт, оҳак, кулолчилик) цех ҳамда 673 та бошқа фаолият билан шуғулланувчи корхона аниқланган. Дастлабки ҳисоб-китобларга кўра, табиий газнинг ноқонуний истеъмоли ҳажми 6,148 миллион метр куб, натижада етказилган зарар эса 4,204 миллиард сўмни ташкил қилган.

Юқорида кўрсатилган ҳолатлар юзасидан расмийлаштирилган ҳужжатлар ҳуқуқни муҳофаза қилиш органларига тақдим этилган.