Тошкентда 540 нафар ногиронлиги бор болага махсус аравачалар топширилди

Соғлиқни сақлаш вазирлиги томонидан Ўзбекистон давлат консерваториясида 3 декабрь — Халқаро ногиронлар кунига бағишлаб ўтказилган тадбирда ногиронлиги бўлган шахсларнинг ҳуқуқ ва манфаатларини ҳимоя қилиш йўналишида олиб борилаётган чора-тадбирлар ва истиқболдаги вазифаларга алоҳида урғу берилди. Бу ҳақда вазирлик томонидан хабар берилди.

Унда Ўзбекистон бош вазири ўринбосари Азиз Абдуҳакимов, соғлиқни сақлаш вазири ўринбосари Абдуҳаким Ҳожибоев, Ўзбекистон Ногиронлар жамиятининг раиси Комил Абдуллаев сўзга чиқиб, иштирокчиларни байрам билан табриклади.

Қайд этилишича, сўнгги уч йил мобайнида республикада кексалар, ногиронлиги бўлган шахслар ва имконияти чекланган болаларга тиббий-ижтимоий хизмат кўрсатиш йўналишида кенг қамровли ислоҳотлар амалга оширилди.

Хусусан, ногиронлиги бўлган шахсларга қулайлик яратиш учун жамоат транспорти пандуслар, алоҳида жойлар билан, бекатлар ва маршрутларни эшиттирувчи, электрон маълумотли таблолар каби махсус воситалар билан жиҳозланади. Шунингдек, ушбу йўналишда кадрлар тайёрлашга, илм-фанни ривожлантиришга ҳам алоҳида эътибор қаратилмоқда. Жумладан, Тошкент врачлар малакасини ошириш институти негизида биринчи марта ижтимоий тиббиёт кафедраси ташкил этилди.

Ўзбекистон Президентининг 2018 йил 20 июндаги «Протез-ортопедия буюмлари ва реабилитация техник воситалари ишлаб чиқарилишини ривожлантириш ҳамда тиббий-ижтимоий муассасаларининг моддий-техника базасини янада мустаҳкамлаш чора-тадбирлари тўғрисида»ги қарори доирасида биринчи марта тизимдаги тиббий-ижтимоий муассасаларни янгидан қуриш, реконструкция қилиш ишларига қарийб 389 миллиард сўм маблағ ажратилди ва бу борада амалий ишлар олиб борилмоқда.

Тадбирда 540 нафар ногиронлиги бор болага замонавий, енгил конструксияли қулай бўлган ногиронлик аравачалари тарқатилди. Таъкидланишича, 3 декабрь — Халқаро ногиронлар куни муносабати билан жорий йилнинг 30 ноябридан 30 декабрига қадар меҳр-мурувват ойлиги ўтказилмоқда. Унда ногиронлиги бўлган шахсларни ҳар тарафлама қўллаб-қувватлашга қаратилган кенг қамровли тадбирларни амалга ошириш кўзда тутилган.