Россия иқтисодий ривожланиш вазири Максим Орешкин 30 ноябрь, шанба куни Россия Олий иқтисодиёт мактаби (ВШЕ) талабалари билан бўлган учрашувда Ўзбекистон 2020 йилда Евросиё иқтисодий иттифоқига қўшилишини маълум қилгани ҳақида иқтисодчи Беҳзод Ҳошимовга таяниб хабар берилган эди.
Бироқ шу хабардан сўнг пайдо бўлган учрашувнинг видеосидан маълум бўлшича, учрашув чоғида Максим Орешкин Ўзбекистоннинг 2020 йилда Евросиё иқтисодий иттифоқига қўшилиши ҳақида гапирмаган.
Қуйида айни шу савол муҳокама қилинган вақтда россиялик вазир томонидан билдирилган фикрларни келтириб ўтамиз:
Талаба: Сизга Ўзбекистон ва Россия ҳукуматлараро қўшма комиссиясининг раиси сифатида саволим бор. 2020 йилда Ўзбекистонда бўлиб ўтадиган МДҲ саммитида Ўзбекистон Евросиё иқтисодий иттифоқига қўшилади. Ўзбекистон ҳукумати бир қанча имтиёзларни сўраган, чунки Ўзбекистон компаниялари Россия ва Қозоғистон компаниялари билан рақобат қила олмайди. Евросиё иқтисодий иттифоқи томонидан мазкур имтиёзлар тақдим этиладими?
Максим Орешкин: (ҳазиллашиб): Сиз Ўзбекистон ҳукуматига ишлайсизми?
Талаба: Йўқ, ишламайман, бироқ у ерда (Ўзбекистонда) хусусий компаниялар учун юқори транзакция харажатлари мавжуд ва Молия вазирлиги уларнинг фаолиятини чеклаб қўйган.
Максим Орешкин: Биз ўзбекистонлик ҳамкасбларимиз билан (бу масалани) кўп муҳокама қилдик. Ўзбекистон ҳозирги пайтда — амалга оширилаётган ислоҳотлар даражаси бўйича етакчи иқтисодиёт.
Шавкат Мирзиёев ҳокимиятга келганда муаммолар жуда кўп эди. Ҳозир улар ечилмоқда, бу осон эмас, улардан кўпчилиги сақланиб турибди. Бироқ мен Ўзбекистоннинг мазкур иқтисодиётига 20 йилдан кейин Собиқ иттифоқ ҳудудида Россиядан кейин иккинчи бўладиган иқтисодиёт сифатида қарайман. Анча тез ўсаётган 35 миллион аҳоли, иқтисодиёт фаол ривожланмоқда.
Ўзбекистонда бўлмаганларга Тошкентга боришни, Тошкентдан Самарқанд, Бухорога қатнайдиган замонавий поездни кўришни тавсия қиламан. Баҳорги таътил вақтида Ўзбекистонга боришни ва томоша қилишни тавсия қиламан.
Биз ҳамкорларимиз билан биргаликда ривожланишга имкон берадиган барча йўлларни топамиз.
Мазкур суҳбатдан маълум бўладики, Ўзбекистоннинг 2020 йилда ЕОИИга қўшилиши ҳақидаги сўзлар Максим Орешкин томонидан эмас, балки унга савол берган талаба томонидан айтилган.
«Дарё» мазкур масала юзасидан ноаниқ ахборот берилгани учун ўз ўқувчиларидан узр сўрайди.
Изоҳ (0)