Ижтимоий тармоқларда 2017 йили таъмирлаш ишлари учун ёпилган Ўзбекистон Миллий боғидаги Алишер Навоий ҳайкали ўрнида экскаватор тургани акс этган суратлар тарқалди.
Тошкент шаҳар ҳокимлигидан «Дарё»га маълум қилишларича, Алишер Навоий ҳайкали атрофида қурилиш ва реконструкция ишларини олиб бориш жараёнида ҳайкал вақтинча боғнинг ўзида бошқа жойга кўчирилган. Ҳокимлик аввалроқ ҳайкал атрофидаги дарахтлар кесилмасдан, бошқа жойга кўчирилаётгани ҳақида хабар берган эди.
Режа бўйича, ҳайкал 2020 йил январь ойида, реставрация ишлари якунига етганидан сўнг, Адиблар хиёбонига қаратилган ҳолда ўз жойига қайта ўрнатилади (бунгача ҳайкал бошқа томонга қараб турган). Янгиланган ҳайкалнинг очилиши 2020 йил февралида, Алишер Навоий таваллуд куни арафасида бўлиб ўтиши кутилмоқда.
Эслатиб ўтамиз, Алишер Навоий номидаги Ўзбекистон Миллий боғи унинг базасида «замонавий ва юқори технологияли» маданият ва истироҳат боғи барпо этиш мақсадида 2017 йил сентябрида ёпилган эди. Парк, Вазирлар Маҳкамаси қарорига мувофиқ, Старгате Сйстемс компаниясига ижарага берилган — ижара муддати лойиҳа ишлари якунланадиган 2021 йил 1 январдан бошлаб 49 йилни ташкил этади.
Ўзбекистон Миллий боғидаги Алишер Навоий ҳайкали 1991 йилда, шоирнинг 550 йиллиги муносабати билан очилган. Тошкент рамзларидан бири бўлган мазкур ҳайкалнинг сурати, жумладан, Ўзбекистоннинг 1994 йилда муомалага чиқарилган 5 сўмлик валютасига туширилган эди.
Изоҳ (0)