Uzbekistan Airways 2019 йилнинг 31 декабридан 2020 йилнинг 2 январига қадар Янги йил байрами нишонланадиган муддатга республика ичидаги авиақатновлар учун чегирмалар эълон қилди. Бу ҳақда компания матбуот хизмати хабар берди.
Унга кўра, байрам чегирмалари:
- Якка йўловчиларга — 30 фоиз;
- Сайёҳлик гуруҳлари (5 кишидан бошлаб), мактаб ўқувчилари, коллеж, лицей ва ОТМлар талабалари, ИИВ, Мудофаа вазирлиги, ДХХ, ДСҚ, ДБҚ ва бошқа идоралар тизимидаги махсус таълим муассасалари ўқувчилари ва тингловчиларига — 40 фоиз;
- Оилаларга (2 кишидан бошлаб — эр ва хотин; эр, хотин ва уларнинг 18 ёшгача бўлган фарзандлари; ота ёки она 18 ёшгача фарзандлари билан) — 50 фоиз;
- Пенсионерлар ва ногиронлиги бўлган инсонларга — 50 фоиз;
- 1941—1945 йиллардаги уруш қатнашчилари ва уларга тенглаштирилганлар, шунингдек, Иккинчи жаҳон уруши йилларида орден ва медаллар билан тақдирланган шахсларга — 50 фоиз;
- Чернобил АЭС фалокати оқибатларини бартараф этишда иштирок этган шахсларга — 50 фоиз.
Чипталар учун чегирма 2019 йилнинг 31 декабридан 2020 йилнинг 2 январига қадар бўлса-да, Uzbekistan Airways сайтидаги маълумотларга кўра, бу кунларда Тошкентдан Фарғона, Қарши ва Навоий шаҳарларига рейслар умуман режалаштирилмаган. Самарқанд, Бухоро, Термиз ва Наманган шаҳарларига эса фақат 2 январда рейслар бор.
Урганч ва Нукус шаҳарларига эса ҳар куни рейслар режалаштирилган.
Шунингдек, компания сайтида Янги йил чегирмаси эълон қилинган кунлар учун қўчимча рейслар ташкил этилиши ҳақида маълумот берилмаган.
Изоҳ (0)