Rossiya iqtisodiy rivojlanish vaziri Maksim Oreshkin 30-noyabr, shanba kuni Rossiya Oliy iqtisodiyot maktabi (VShE) talabalari bilan bo‘lgan uchrashuvda O‘zbekiston 2020-yilda Yevrosiyo iqtisodiy ittifoqiga qo‘shilishini ma’lum qilgani haqida iqtisodchi Behzod Hoshimovga tayanib xabar berilgan edi.
Biroq shu xabardan so‘ng paydo bo‘lgan uchrashuvning videosidan ma’lum bo‘lshicha, uchrashuv chog‘ida Maksim Oreshkin O‘zbekistonning 2020-yilda Yevrosiyo iqtisodiy ittifoqiga qo‘shilishi haqida gapirmagan.
Quyida ayni shu savol muhokama qilingan vaqtda rossiyalik vazir tomonidan bildirilgan fikrlarni keltirib o‘tamiz:
Talaba: Sizga O‘zbekiston va Rossiya hukumatlararo qo‘shma komissiyasining raisi sifatida savolim bor. 2020-yilda O‘zbekistonda bo‘lib o‘tadigan MDH sammitida O‘zbekiston Yevrosiyo iqtisodiy ittifoqiga qo‘shiladi. O‘zbekiston hukumati bir qancha imtiyozlarni so‘ragan, chunki O‘zbekiston kompaniyalari Rossiya va Qozog‘iston kompaniyalari bilan raqobat qila olmaydi. Yevrosiyo iqtisodiy ittifoqi tomonidan mazkur imtiyozlar taqdim etiladimi?
Maksim Oreshkin: (hazillashib): Siz O‘zbekiston hukumatiga ishlaysizmi?
Talaba: Yo‘q, ishlamayman, biroq u yerda (O‘zbekistonda) xususiy kompaniyalar uchun yuqori tranzaksiya xarajatlari mavjud va Moliya vazirligi ularning faoliyatini cheklab qo‘ygan.
Maksim Oreshkin: Biz o‘zbekistonlik hamkasblarimiz bilan (bu masalani) ko‘p muhokama qildik. O‘zbekiston hozirgi paytda — amalga oshirilayotgan islohotlar darajasi bo‘yicha yetakchi iqtisodiyot.
Shavkat Mirziyoyev hokimiyatga kelganda muammolar juda ko‘p edi. Hozir ular yechilmoqda, bu oson emas, ulardan ko‘pchiligi saqlanib turibdi. Biroq men O‘zbekistonning mazkur iqtisodiyotiga 20 yildan keyin Sobiq ittifoq hududida Rossiyadan keyin ikkinchi bo‘ladigan iqtisodiyot sifatida qarayman. Ancha tez o‘sayotgan 35 million aholi, iqtisodiyot faol rivojlanmoqda.
O‘zbekistonda bo‘lmaganlarga Toshkentga borishni, Toshkentdan Samarqand, Buxoroga qatnaydigan zamonaviy poyezdni ko‘rishni tavsiya qilaman. Bahorgi ta’til vaqtida O‘zbekistonga borishni va tomosha qilishni tavsiya qilaman.
Biz hamkorlarimiz bilan birgalikda rivojlanishga imkon beradigan barcha yo‘llarni topamiz.
Mazkur suhbatdan ma’lum bo‘ladiki, O‘zbekistonning 2020-yilda YeOIIga qo‘shilishi haqidagi so‘zlar Maksim Oreshkin tomonidan emas, balki unga savol bergan talaba tomonidan aytilgan.
“Daryo” mazkur masala yuzasidan noaniq axborot berilgani uchun o‘z o‘quvchilaridan uzr so‘raydi.
Izoh (0)