Қувада газ ва электрсиз қолган аҳоли норозилик билдириб, йўлни тўсди

Фарғона вилоятининг Қува тумани аҳолиси 30 ноябрь куни 18:00 да йўлни тўсиб қўйган. Бу ҳақда туман ИИБга асосланиб, «Gazeta.uz» хабар бермоқда.

«Туман ҳокими, ИИБ бошлиғи, туман газ идораси ходимлари, туман электр тармоқлари раҳбарлари аҳоли билан учрашув ўтказди. Муаммолар шу куннинг ўзидаёқ бартараф этилди», — дея маълум қилган ИИБ вакиллари.

Хабар беришларича, газ қувурининг ёрилиб кетиши оқибатида газ таъминоти узилиб қолган, оқибатда электр энергияси истеъмоли ошиб кетиб, бу электр таъминотидаги узилишларга сабаб бўлган.

Фарғона ҳудудий электр тармоқлари корхонаси «Gazeta.uz»нинг сўровига асосан Фарғона вилояти, хусусан Қува туманида электр таъминотида тез-тез узилишлар бўлаётгани юзасидан изоҳ берган.

Корхона маълумотларига кўра, у ҳар куни 17,4 миллион кВт⋅с электр энергияси етказиб бермоқда (жойлардаги чекловлар билан), ваҳоланки, ҳудуд учун тасдиқланган режа 16,6 миллион кВт⋅сни, электр энергия ишлаб чиқариш баланси эса 16,3 миллион кВт⋅сни ташкил этади.

Айни вақтда вилоятдаги истеъмолчиларнинг кунлик эҳтиёжи 20 миллион кВт⋅с деб баҳоланган.

Фарғона ҳудудий электр тармоқлари корхонаси «Ўзбекистон миллий электр тармоқлари» компаниясига электр энергия ишлаб чиқаришни 2,6 миллион кВт⋅сга ошириш зарурлиги ҳақида таклиф киритган. Корхона вакилларининг қайд этишича, мутахассислар «электр энергиянинг сифатли таъминотини таъминлаш мақсадида кун-у тун меҳнат қилмоқда».

Қува тумани асосан 110 кВ кучланишли «Л-Қува», шунингдек, 35 кВ кучланишли «Л-Наврўз», «Л-Шарқий Арсиф», «Л-Сойгузар», «Л-Анор», «Л-Тошҳовуз» ва «Л-БТ» электр узатиш ҳаво линиялари ҳисобидан электр энергияси билан таъминланади.

Совуқ кунлар бошланиши билан электр энергия истеъмоли ошади. Корхона вакилларининг таъкидлашича, энерготизимнинг барқарор фаолиятини таъминлаш мақсадида жойлардаги электр узатиш линияларида чекловлар жорий этилади.

30 ноябрь куни қуйидаги линияларда электр таъминотининг ўчирилиши кузатилган:

• «Л-Қува» — соат 2:49 да ўчирилган, 4:08 да қайта уланган; 1 соат 19 дақиқа электр бўлмаган;
• «Л-Қува» — соат 7:15 да ўчирилган, 7:54 да қайта уланган; 39 дақиқа электр бўлмаган;
• «Л-Қува» — соат 9:40 да ўчирилган, 10:12 да қайта уланган; 32 дақиқа электр бўлмаган;
• «Л-Сойгузар» — соат 6:36 да ўчирилган, 8:00 да қайта уланган; 1 соат 46 дақиқа электр бўлмаган;
• «Л-Сойгузар» — соат 18:00 да ўчирилган, 19:00 да қайта уланган; 1 соат электр бўлмаган;
• «Л-БТ» — соат 5:04 да ўчирилган, 6:10 да қайта уланган; 1 соат 6 дақиқа электр бўлмаган;
• «Л-БТ» — соат 17:05 да ўчирилган, 18:00 да қайта уланган; 55 дақиқа электр бўлмаган;
• «Л-Шарқий Арсиф» — соат 12:00 да ўчирилган, 13:30 да қайта уланган; 1 соат 30 дақиқа электр бўлмаган;
• «Л-Шарқий Арсиф» — соат 18:00 да ўчирилган, 19:00 да қайта уланган; 1 соат электр бўлмаган;
• «Л-Шарқий Арсиф» — соат 1:55 да ўчирилган, 4:10 да қайта уланган; 2 соат 15 дақиқа электр бўлмаган;
• «Л-Шарқий Арсиф» — соат 6:10 да ўчирилган, 6:35 да қайта уланган; 25 дақиқа электр бўлмаган.

Эслатиб ўтамиз, 27 ноябрь куни бош вазир Абдулла Арипов раислигидаги энергия таъминотидаги муаммоларга бағишланган йиғилиш ўтказиб, соҳа мутасаддиларини кескин танқид қилган эди. Хусусан, ҳатто метрополитен фаолияти ва телеузатишлар вақтида ҳам электр узилиб қолишини бош вазир «шармандали ҳолат» дея таърифлаган эди. Ушбу селектордан кўп ўтмай Ўзбекистон 1 декабрдан бошлаб Туркманистондан электр энергияси импорт қилиши ҳақида хабар берилди.Аввалроқ Фарғона вилоятида 2018 йил бошида тугатилган назорат постлари қайта тикланаётгани ҳақида хабар берилган эди.