Ўзбекистонда талабаларга ярим ставкадан ортиқ бўлмаган ҳажмда ишлаш ҳуқуқи берилиши мумкин. Бу Вазирлар Маҳкамасининг «Олий таълим тўғрисидаги низомни тасдиқлаш ҳақида»ги қарори лойиҳасида назарда тутилган.
Унга кўра, кундузги таълим шаклида таҳсил олаётган талабаларга ўқишдан бўш вақтларида меҳнат шартномаси бўйича олий таълим муассасаси ёки бошқа ташкилотларда ишлашга рухсат берилади.
Низом «Таълим тўғрисида»ги қонун ҳамда олий таълим тизимига оид норматив-ҳуқуқий ҳужжатларига мувофиқ олий таълим жараёнини ташкил этиш, олий таълим тизимини бошқариш жараёнларини, унинг молиявий, мулкий ҳамда халқаро ҳамкорлик муносабатларини тартибга солади.
Шунингдек, ҳужжатда олий таълим муассасалари талабалари ва ходимларининг ҳуқуқ ва мажбуриятлари белгиланган.
ОТМ фаолиятидан норози бўлганлар белгиланган тартибда, тасарруфида олий таълим муассасалари бўлган вазирликлар ва идоралар ёки судга мурожаат қилиш ҳуқуқига эгалиги қайд этилган.
Қарор лойиҳаси муҳокамаси шу йилнинг 14 декабрига қадар давом этади.
Изоҳ (0)