Ўзбекистоннинг Жиноят, Жиноят-процессуал ҳамда Маъмурий жавобгарлик тўғрисидаги кодексига ўзгартиш ва қўшимчалар киритиш тўғрисидаги қонун лойиҳаси жамоатчилик муҳокамаси учун эълон қилинди.
Ҳужжатга кўра, Ўзбекистоннинг 1994 йил 22 сентябрда қабул қилинган қонуни билан тасдиқланган Жиноят кодексидан 189- ва 192-моддалар чиқариб ташланиши режалаштирилган.
189-моддада савдо ёки хизмат кўрсатиш қоидаларини бузиш учун жиноий жавобгарлик белгиланган. Товарлар савдоси ёки хизмат кўрсатиш қоидаларини жуда кўп миқдордаги қийматда бузган шахслар энг кам ойлик иш ҳақининг 300 бараваридан 600 бараваригача миқдорда жарима ёки 2 йилгача ахлоқ тузатиш ишлари билан жазоланади.
Биринчи марта жиноят содир этган шахс, агар у жиноят аниқланган кундан эътиборан 30 кунлик муддатда савдо ёки хизмат кўрсатиш қоидалари бузилишининг оқибатларини бартараф этган ва етказилган моддий зарарнинг ўрнини қоплаган бўлса, жавобгарликдан озод этилади.
192-моддада рақобатчини обрўсизлантириш учун жиноий жавобгарлик назарда тутилган. Хусусан, рақобатчини обрўсизлантириш, яъни босма ёки бошқача усулда кўпайтирилган матнларда ёки оммавий ахборот воситалари орқали хўжалик юритувчи субъектнинг ишбилармонлик нуфузига путур етказиш мақсадида била туриб ёлғон, ноаниқ ёки бузиб кўрсатилган маълумотларни тарқатиш жиноятлари келтирилган.
Ушбу моддада кўрсатилган жиноятни содир этганлик учун энг кам ойлик иш ҳақининг 50 бараваридан 100 бараваригача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари жазолари белиланган.
Изоҳ (0)