Саудия Арабистони ҳукумати ҳибсга олинган журналистларнинг уч нафарини озод қилди

Саудия Арабистони ҳукумати ноябрь ўрталарида қамоққа олинган саккиз нафар журналистнинг уч нафарини озод қилди. Бу ҳақда Саудия ҳуқуқ ҳимоячилари ташкилоти ALQST’га таяниб «РИА Новости» хабар берди.

Аввал Саудия ҳуқуқ ҳимоячилари қироллик ҳукуматини журналистлар ва жамоат фаолларини, жумладан, журналист ва ёзувчи Зана аш-Шаҳрий ва блогер Фуад ал-Фарҳанни ҳибсга олганликда айблаган.

«Халқаро ижтимоий босим ва журналистларнинг ҳибсга олингани ҳақида ОАВда жуда кўп гапирилиши Саудия ҳукуматининг Бадер ар-Рашид, Сулаймон ан-Носсир ва Фуад ал-Фарҳанни ҳибсдан озод этишига мажбур қила олди», — дейилади ALQST’нинг Twitter’даги микроблогида.

ALQST has learned that the #Saudi authorities have carried out new arrests of journalists, writers and activists, both women and men, in recent days.

They have also stepped up their torture, sexual harassment & abuse of existing prisoners of conscience.https://t.co/bEMKdyHTBA https://t.co/1UIMQdrLSG pic.twitter.com/aGYxop406A

— ALQST for Human Rights (@ALQST_En) November 25, 2019

Ҳуқуқ ҳимоячилари ҳукуматни сўз эркинлигига ҳужум қилишни тўхтатиш ва виждон амрига бўйсунган ҳақиқатпарвар маҳбусларни озод этишни талаб қилган.

ALQST’нинг ёзишича, 16 ноябрда қироллик хавфсизлик хизмати Ар-Риёдда яшовчи саудиялик тўрт нафар ёзувчининг уйларида тинтув ўтказиб, уларни ҳибсга олган, компьютер ва мобил қурилмаларини олиб қўйган. Яна бир ёзувчи Абдул Мажид Ал-Булювий эса бир неча кун аввал Мадинада қамоққа олинган. Шунингдек, Жидда, Абха ва Хайил каби мамлакатнинг бошқа шаҳарларида ҳам ёзувчи ҳамда блогерлар ҳибсга олинган.

2015 йилда шаҳзода Муҳаммад бин Салмон ҳукумат тепасига келганидан бери зиёлилар қатламининг илғор вакиллари тез-тез қамоққа тушмоқда, оммавий ҳибсларнинг охирги тўлқини жорий йилнинг апрель ойида кузатилганди. Ўшанда бир қатор ёзувчилар қамоққа тушган, аммо уларнинг айби нима экани ҳозиргача маълум қилинмаган.