Saudiya Arabistoni valiahd shahzodasi jurnalist Jamol Qoshiqchining o‘limi uchun javobgar ekanini tan oldi
Saudiya Arabistonining valiahd shahzodasi Muhammad bin Salmon saudiyalik jurnalist Jamol Qoshiqchining o‘limi uchun o‘zini javobgar deb biladi. U bu haqda PBS telekanalining hujjatli filmi uchun bergan intervyusida ma’lum qilgan.
“Butun javobgarlik mening zimmamda, chunki bu ish mening ish vaqtimda sodir bo‘ldi”, — deyiladi film anonsida. Filmning to‘liq versiyasi 1-oktabr kuni namoyish etilishi kutilmoqda.
The Washington Post gazetasida ishlagan Jamol Qoshiqchi 2018-yil oktabrida o‘ldirilgan edi. Turkiya rasmiylari, AQSh Senati va Markaziy razvedka boshqarmasining taxminiga ko‘ra, jurnalistni o‘ldirish haqidagi buyruq Saudiya Arabistoni valiahd shahzodasi Muhammad bin Salmon tomonidan berilgan.
Ar-Riyod bu kabi ayblovlarni rad etib, qotillikni mamlakat kuch ishlatar tuzilmalarning alohida xodimlari tashabbusi deb atagan edi. Ushbu jinoyatni sodir etishda gumonlanayotganlar Saudiya Arabistonida sudga topshirilgan, ularga o‘lim jazosi tayinlanishi mumkin.
